वेंगुर्ले : शाश्वत सेवा बहुउद्देशीय संस्था सिंधुदुर्ग व जागृती कला-क्रीडा सांस्कृतिक मंडळ वेंगुर्ले यांच्या संयुक्त विद्यमाने तसेच शालेय शिक्षण मंत्री दीपक केसरकर मित्रमंडळ व शिवसेना वेंगुर्ले पुरस्कृत संजय मालवणकर स्मृती शाश्वत कला-क्रीडा जागृतोत्सव २०२४ चे आयोजन शनिवार ३ व रविवार ४ फेब्रुवारी रोजी करण्यात आले आहे.  या जागृतोत्सवात बालवाडी ते दहावीपर्यंतच्या मुलांसाठी विविध स्पर्धांचे आयोजन करण्यात आले आहे. तर माय-लेकरू नृत्य स्पर्धा व समूहनृत्य स्पर्धेने या महोत्सवाची सांगता होणार आहे.

जागृतोत्सवाच्या पहिल्या दिवशी म्हणजे ३ फेब्रुवारी रोजी सायंकाळी ठिक ४ वाजता २ ते ६ वर्षे वयोगटातील बालवाडीत शिकणाऱ्या चिमुकल्यांसाठी बडबडगीत्त स्पर्धा होणार आहे, तर ठिक ५ वाजता संस्कृत श्लोक पाठांतर स्पर्धा होणार आहे. स्पर्धकांना मनाचे श्लोक, रामरक्षा, हनुमान चालिसा, भगवतगीता, पसायदान आदी संस्कृत श्लोक सादर करता येतील, त्यानंतर ठिक ६ वाजता बालवाडीतील मुलांसाठीच फॅन्सीड्रेस स्पर्धा घेण्यात येईल. या स्पर्धेत मुलांना मनपसंत वेशभूषा करता येईल. संवाद बोलणे बंधनकारक नाही. त्यानंतर सायं. ७ वाजता फक्त वेंगुर्ले तालुक्यातील बालवाडीत शिकणाऱ्या मुलांसाठी बालनृत्य स्पर्धा होणार आहे. सादरीकरणासाठी कमाल ३ मिनिटे वेळ निर्धारित करण्यात आला आहे. चारही स्पर्धेतील प्रथम पाच विजेत्यांना अनुक्रमे ५००, ३००, २००, १०० व १०० रुपयांची शालोपयोगी भेटवस्तू तसेच प्रथम तीन विजेत्यांना स्मृतिचिन्ह व सहभागी सर्वांना प्रमाणपत्र पारितोषिक स्वरुपात देण्यात येईल.

सायंकाळी ठिक ६.३० वाजता पहिली ते चौथी व पाचची ते दहावी गटासाठी सर्वेष अभिनय स्पर्धा घेण्यात येईल. मुलांना कोणताही समाजसुधारक, राष्ट्रीय नेता, ऐतिहासिक, पौराणिक पात्र, समाजप्रबोधन, सामाजिक व्यथा मांडणारी व्यक्तिमत्वे यापैकी कोणतीही एक वेशभूषा सादर करता येईल. पहिली ते चौथीसाठी अनुक्रमे ५००, ३००, २००, १००, १०० रुपये पाचवी ते दहावीसाठी ७००, ५००, ३००, २००, १०० अशी रोख पारितोषिके तसेच प्रथम तीन विजेत्यांना स्मृतिचिन्ह व सहभागी सर्वांना प्रमाणपत्र देण्यात येईल.

सायंकाळी ठिक ७.३० वाजता केवळ वेंगुर्ले तालुक्यातील शालेय मुलांसाठी एकेरी नृत्य स्पर्धा घेण्यात येणार आहे. सादरीकरणासाठी कमाल ३ मिनिटे वेळ मर्यादा आहे. पहिली ते चौथी गटासाठी ५००, ३००, २००, १००, १००, पाचवी ते सातवी गटासाठी ७००, ५००, ३००, २००, १०० व आठवी ते दहावी गटासाठी १०००, ७००, ५००, ३००, २०० अशी रोख बक्षिसे तसेच प्रथम तीन विजेत्यांना स्मृतिचिन्ह व सहभागी सर्वांना प्रमाणपत्र देण्यात येईल.

१२ गटात होणार मिनी  मॅरेथॉन स्पर्धा

रविवार ४ फेब्रुवारी रोजी सकाळी ठिक ६.३० वाजता वेंगुर्ला कॅम्प येथील मैदानावर 'स्वच्छ सुंदर वेंगुर्ल्यासाठी एक धाव' या शीर्षकखाली जिल्हास्तरीय मिनी मॅरेथॉन स्पर्धेचे आयोजन करण्यात आले आहे. बालवाडीत शिकणाऱ्या मुली व मुलांच्या गटासाठी ५० मीटर एवढे अंतर धावायचे आहे. प्रथम पाच विजेत्यांना अनुक्रमे ५००, ३००, २००, १००, १०० रुपये किमतीची शालेय उपयोगी भेवटस्तू देण्यात येईल. पहिली ते दुसरी मुली व मुलांच्या संघासाठी २०० मीटर अंतर धावायचे आहे. तिसरी ते चौथी मुली व मुलांच्या गटासाठी अर्धा किलोमीटर अंतर धावायचे आहे. चारही गटातील विजेत्यांना अनुक्रमे रोख ५००, ३००, २००, १००, १०० रुपये, पाचवी ते सातवी गटासाठी एक किलोमीटर अंतर धावायचे आहे. प्रथम पाच विजेत्यांना अनुक्रमे रोख ७००, ५००, ३००, २००, १०० रुपये तर आठवी ते दहावीच्या मुली व मुलगे गटासाठी २ किलोमीटर अंतर धावावे लागणार आहे. विजेत्यांना अनुक्रमे रोख १०००, ७००, ५००, ३००, २०० रुपयांची पारितोषिके देण्यात येतील. महिला व पुरुष खुल्या गटासाठी ५ किलोमीटर अंतर धावावे लागणार आहे. विजेत्यांना १५००, १०००, ७००, ५००, ३००, २०० अशी रोख रक्कमेची बक्षिसे तर मॅरेथॉनच्या बाराही गटातील प्रथम तीन विजेत्यांना स्मृतिचिन्ह व सहभागी सर्वांनाच सहभाग प्रमाणपत्र प्रदान करण्यात येईल.

याच दिवशी सकाळी ठिक १०.३० वाजता भटवाडी येथील सिद्धिविनायक मंगल कार्यालयात बालवाडीतील चिमुकल्यांसाठी रंगभरण तर शालेय मुलांसाठी बालकुमार चित्रकला स्पर्धेचे आयोजन करण्यात आले आहे. बालवाडी गटासाठी ५००, ३००, २००, १००, १०० रुपयांची शालेपयोगी भेटवस्तू देण्यात येईल. बालकुमार चित्रकलेच्या पहिली ते चौथी गटासाठी माझा आवडता प्राणी विषय असून पाच विजेत्यांना रोख ५००, ३००, २००, १००, १०० रुपये, तर पाचवी ते दहावी गटासाठी माझा आवडता सण हा विषय देण्यात आला आहे. पाच विजेत्यांना रोख ७००, ५००, ३००, २००, १०० अशी बक्षिसे तसेच सर्वच गटातील प्रथम तीन विजेत्यांना स्मृतिचिन्हे व सहभागी सर्व स्पर्धकांना प्रमाणपत्र देण्यात येईल.

माय-लेकरू नृत्य, विधन परवार स्मृती समूहनृत्य स्पर्धा

रविवार ४ रोजी सायंकाळी ठिक ६ वाजता जिल्हास्तरीय माय-लेकरू नृत्य स्पर्धा होणार आहे. यात आई व मुल किंवा बाबा व मुल सहभाग घेऊ शकतात. प्रथम पाच विजेत्यांना रोख २०००, १५००, १०००, ५००, ३०० रुपयांचे पारितोषिक देण्यात येईल. याच दरम्यान व विधान परवार स्मृती जिल्हास्तरीय समूह नृत्य स्पर्धा घेण्यात येणार आहे. वयाचे बंधन नाही. समुहात किमान पाच मुलांचा सामावेश अत्यावश्यक आहे विजेत्यांना रोख ५०००, ३०००, २०००, १०००, १००० अशी पारितोषिके तसेच दोन्ही स्पर्धेतील प्रथम तीन विजेत्यांना स्मृतिचिन्ह व सहभागी सर्वांना प्रमाणपत्र देण्यात येईल.

सर्वाधिक पारितोषिके पटकाविणाऱ्या शाळेस शिक्षणमंत्री चॅम्पियनशीप

शालेय गटाची शालेय एकेरी नृत्य स्पर्धा वगळता इतर सर्व स्पर्धा जिल्ह्यातील मुलांसाठी खुल्या करण्यात आल्या आहेत. सर्वाधिक पारितोषिके पटकाविणऱ्या शाळेला संजय मालवणकर स्मृती शिक्षणमंत्री करंडक देऊन गौरविण्यात येणार आहे. स्पर्धेतील सहभागासाठी आगावू नावनोंदणी अत्यावश्यक असून इच्छुकांनी स्पर्धाप्रमुख ऐश्वर्या संजय मालवणकर ९४२३७९३०३४ यांच्याशी तात्काळ संपर्क साधावा. या महोत्सवात जिल्ह्यातील बहुसंख्य मुलांनी सहभाग घ्यावा, असे आवाहन शाश्वत सेवा बहुउद्देशीय संस्थेच्या अध्यक्ष सौ. मिताली महेंद्र मातोंडकर व जागृतीचे अध्यक्ष दिलीप मालवणकर यांनी केले आहे.