कणकवली : कणकवली शहरातील गांगोमंदिर समोरील महामार्गालगत असलेल्‍या चिंतामणी पार्क सहकारी गृहनिर्माण संस्थेची निवडणूक प्रक्रिया कोल्हापूर येथील सहकारी न्यायालय क्रं.२ ने बेकायदेशीर ठरवली आहे. त्‍याचबरोबर संस्थेच्या संचालक मंडळाला संस्थेचे काम करण्यास कायमची मनाई करण्यात आली आहे.
चिंतामणी पार्क सहकारी गृहनिर्माण संस्थेची स्थापना २९ जून २०१९ रोजी झाली. या संस्थेत ३८ फ्लॅट आणि १० दुकानगाळे आहेत. या संस्थेचे कामकाज पाच महिने व्यवस्थित सुरू होते. त्‍यानंतर सात सदस्यांनी १६ नाेव्हेंबर २०१९ एकत्रितपणे राजीनामा दिला. त्‍यामुळे सहकारी संस्था सहाय्यक निबंधक यांनी २३ मार्च २०२० रोजी या संस्थेवर प्रशासक नेमला. ६ ऑगस्ट २०२० रोजी सहाय्यक निबंधक एल.एस.लष्कर यांची या संस्थेवर प्रशासक म्‍हणून नियुक्‍ती करण्यात आली. तर ३१ मे २०२१ रोजी श्री.लष्कर यांनी आदेश जारी करून रविकिरण शांताराम खांडेकर यांची या संस्थेवर प्रशासक म्‍हणून नियुक्‍ती केली.
चिंतामणी पार्क सहकारी गृहनिर्माण संस्थेची सन २०२०-२१ मध्ये निवडणूक होणे आवश्‍यक होते. मात्र कोविड प्रादुर्भाव असल्‍याने ही निवडणूक पुढे ढकलण्यात आली. त्‍यानंतर सन २०२१-२२ ते २०२६-२०२७ या वर्षासाठी संस्थेचा निवडणूक कार्यक्रम जाहीर करण्यात आला. यात गृहनिर्माण सहकारी संस्थेमध्ये ४८ मालमत्ता धारक सदस्य असताना, नियमबाह्यपणे जास्त सदस्य दाखविण्यात आले.
चिंतामणी संस्थेची सन २०२१-२०२२ ते २०२६-२७ साठी निवडणूक कार्यक्रम आणि मतदारयादी प्रसिद्ध करण्यात आली. यात केवळ १९ सदस्यांचा समावेश करण्यात आला. त्‍याला अनेक सभासद यांनी आक्षेप घेतला. परंतु निवडणूक निर्णय अधिकारी श्री किरण वसंत निकम, प्रशासक श्री रविकिरण शांताराम खांडेकर आणि सहाय्यक निबंधक यांचेकडून त्या आक्षेपाला उत्तर देण्यात आले नाही.
त्‍यामुळे संस्था सभासद श्रीम.अक्षदा मडवळ यांनी निवडणूक निर्णय अधिकारी व प्रशासक यांच्या विरोधात तक्रार दाखल करून निवडणूक स्थगित करण्याची मागणी केली. परंतु त्‍यावर कोणताही निर्णय झाला नाही. त्‍यानंतर संस्थेवरील प्रशासक, निवडणूक निर्णय अधिकारी यांनी गुप्तपणे निवडणूक प्रक्रिया राबविण्याचा प्रयत्‍न केला. यात निवडणूक कार्यक्रम प्रकाशित करण्यात आला नाही. सुधारित मतदार यादी जाहीर करण्यात आली नाही. संस्थेचे थकबाकीदार यांना मतदान व उमेदवारीचा हक्क बहाल करून बेकायदेशीरपणे निवडणूक प्रक्रिया पूर्ण करण्यात आली.
या सर्व प्रक्रिये विरोधात चिंतामणी पार्क सहकारी गृहनिर्माण संस्थेच्या सभासद श्रीम.अक्षदा शिवाजी मडवळ यांनी कोल्हापूर येथील सहकार न्यायालयात १५ सप्टेंबर २०२२ रोजी दावा दाखल केला होता. त्‍याचा निकाल २६ मार्च २०२५ रोजी जाहीर करण्यात आला. यात न्यायालयाने चिंतामणी पार्क सहकारी गृहनिर्माण संस्थेची निवडणूक प्रक्रिया बेकायदेशीर ठरवली आहे. व निवडणूक निर्णय अधिकारी व प्रशासक यांच्या कार्यप्रणालीवर नाराजी व्यक्त करून निवडून आलेले श्री धनराज नामदेव दळवी, श्री प्रसन्न दिनानाथ देसाई, श्री उमेश गणपती कामत, श्री दामोदर भालचंद्र खानोलकर, श्री निलेश गोपीनाथ पाटणे, श्री उमेश यशवंत राणे, श्री रंजन बाळकृष्ण चिके, श्रीम प्रियांका प्रकाश दळवी, श्रीम माही मंदार परुळेकर, श्री अनंत परशूराम बंडागळे या संचालक मंडळातील सदस्यांना सहकारी संस्थेत संचालक म्‍हणून काम करण्यास कायमची मनाई करण्यात आली आहे.
वादी तर्फे ऍडव्होकेट संजय डीक्रूज कोल्हापूर यांनी काम पाहिले
