कणकवली : बुधवारी सायंकाळपासून बेपत्ता असलेले तोंडवली - कुडतरकरवाडी येथील सुरेश गणपत नर (६१) हे बुधवारीच रात्री ११ वाजण्याच्या सुमारास कुडतरकरवाडी येथील आपल्या बागेमधील विहिरीत मृतावस्थेत आढळून आले. गुरुवारी सकाळच्या सुमारास त्यांचा मृतदेह विहिरीबाहेर काढण्यात आला. सुरेश विहिरीमध्ये कसे पडले हे समजू शकलेले नाही.
सुरेश हे बुधवारी संध्याकाळच्या सुमारास कुडतरकरवाडी येथील आपल्या बागेमध्ये काम करण्यासाठी गेले होते. रात्री दहा वाजेपर्यंत ते घरी न आल्याने कुडतरकरवाडी येथीलच प्रल्हाद कुडतरकर यांनी गावचे पोलीस पाटील विजय मोरये यांना कळवले. त्यानंतर कुडतरकर, मोरये यांच्यासह ग्रामस्थांनी सुरेश हे काम करत असलेल्या बागेमध्ये शोध घेतला. यामध्ये सुरेश यांच्या चपला विहिरीमध्ये दिसून आल्या. तर रात्री ११ वाजण्याच्या सुमारास सुरेश यांचा मृतदेह देखील विहिरीतील पाण्यात तरंगताना दिसला. विहीर खूप खोल असल्यामुळे अग्निशमन केंद्र कुडाळ यांना पाचारण करण्यात आले. त्यांच्या मदतीने ग्रामस्थांनी गुरुवारी सकाळी ८ वाजता सुमारास मृतदेह पाण्याबाहेर काढला. घटनेबाबत पोलीस पाटील विजय मोरये यांनी दिलेल्या खबरीनुसार कणकवली पोलीस ठाण्यात नोंद करण्याची कार्यवाही आता सुरू आहे.
