देवगड : श्री क्षेत्र कुणकेश्वर भाविकांच्या स्वागतासाठी सज्ज झाले असून श्री क्षेत्र कुणकेश्वर येथे श्रावणातील पहिल्या श्रावणी सोमवार ला आज पासून सुरुवात होत आहे.या श्रावण सोमवारची तयारी सध्या अंतिम टप्प्यात असून पहिल्या श्रावण सोमवार च्या पूजेचा मान सुरेश नेरुरकर व आनंद शिरवलकर यांना देण्यात आला आहे.येणाऱ्या भाविक भक्तांच्या सोयीसुविधा व दर्शन व्यवस्था नियोजन ट्रस्ट वतीने करण्यात आली असून सर्व भाविक, भक्त, पर्यटक यांनी देवस्थान ट्रस्ट कुणकेश्वर आणि प्रशासकीय यंत्रणेस सहकार्य करावे तसेच कुणकेश्वर या तीर्थ क्षेत्री भाविकांनी येतेवेळी व जातेवेळी काळजी पूर्वक सुरक्षित प्रवास करावा असे आवाहन ट्रस्ट अध्यक्ष एकनाथ केशव तेली यांनी केले आहे.
दक्षिण कोकणची काशी म्हणून संबोधले गेलेले श्री क्षेत्र कुणकेश्वर येथे श्रावणी सोमवार उत्सव प्रति वर्षाप्रमाणे संपन्न होणार असून दिनांक २८ जुलै २०२५ व दिनांक ०४ ऑगस्ट ११ ऑगस्ट व १८ ऑगस्ट २०२५ या चारही श्रावणी सोमवारी येणाऱ्या भाविक भक्ताकारीता सुलभ दर्शन व्यवस्थेचे नियोजन करण्यात आले आहे.त्याचप्रमाणे प्रशासनाच्या वतीने पोलीस बंदोबस्त व पार्किंग व्यवस्था करण्यात आली आहे. प्रतिवर्षाप्रमाणे प्रत्येक श्रावणी सोमवारी विविध मान्यवरांच्या हस्ते प्रथम पूजां संपन्न होणार आहे.
प्रत्येक सोमवारी प्रथम पुजा झाल्यानंतर सकाळी सुमारे ०६:०० वाजता दर्शन रांगा चालु करण्यात येतील प्रतिवर्षाप्रमाणे रा.प.म. देवगड आगार यांच्या वतीने श्रावणी सोमवार निमित्त स्पेशल देवगड कुणकेश्वर तसेच रत्नागिरी सावंतवाडी कणकवली येथून जादा एसटी बसेसची व्यवस्था देखील यावेळी करण्यात आली आहे.प्रत्येक श्रावणी सोमवारी मंदिरामध्ये सकाळी ०६:०० ते रात्रौ ०८:०० या कालावधीमध्ये महाराष्ट्रातील सुप्रसिद्ध नामांकित भजनी मंडळांचे कार्यक्रम सादर होणार आहेत.
दक्षिण कोकणची काशी म्हणून संबोधले गेलेलेश्री क्षेत्र कुणकेश्वर येथे श्रावणी सोमवार उत्साहात साजरे केले जातात यावर्षीही भाविकांची श्री क्षेत्र कुणकेश्वर येथे मोठ्या प्रमाणात शिवभक्तांची गर्दी होणार असून श्री देव कुणकेश्वर मंदिर देवस्थान ट्रस्ट कुणकेश्वर यांनी भाविकांच्या सोयीसाठी दर्शन मंडप तसेच दर्शन रांगांची व्यवस्था केलेली आहे.भाविकांना थेट गाभाऱ्यात जाऊन श्रींचे दर्शन घेता येणार आहे.मात्र अभिषेक व तत्सम धार्मिक विधी सोमवारी गाभाऱ्याच्या बाहेर होतील. श्रावणी सोमवारी विविध क्षेत्रातील मान्यवरांकडून श्री देव कुणकेश्वराची पहाटे ६ वाजता प्रथम पूजा केली जाईल यानंतर भाविकांना दर्शन खुले होईल. तरी भाविकांनी रांगेतून दर्शन घ्यावे असे आवाहन श्री.क्षेत्र कुणकेश्वर देवस्थान ट्रस्ट चे अध्यक्ष श्री एकनाथ केशव तेली यांच्या वतीने करण्यात आले आहे.दरवर्षी श्रावण सोमवारी कुणकेश्वर येथे होणारी वाढती गर्दी पाहता कुणकेश्वरला मिनी जत्रेचे स्वरूप प्राप्त होत असते त्यामुळे बहुतेक शाळा कॉलेजचे विद्यार्थी पावसाळी वन-डे पिकनिक साठी कुणकेश्वरला पसंती दर्शवितात.
