कणकवली : भिरंवडे - कदमवाडी येथील गणेश सूरेश कदम या 25 वर्षीय युवकाचा गोवा बांबुळी रूग्णालयात उपचारादरम्यान मृत्यू झाला. बीएससी नर्सिंग पर्यंतचे शिक्षण पूर्ण केल्यानंतर तो मुंबईतील खाजगी रूग्णालयात नोकरीला होता. ताप येत असल्यामुळे तपासणी अहवाल डेंग्यु पॉझिटिव्ह आल्याने तो उपचारासाठी गावी आला होता. खाजगी रूग्णालयातील उपचारानंतर त्याला अधिक उपचारासाठी गोवा बांबुळी रूग्णायात मंगळवारी दाखल करण्यात आले होते. उपचारा दरम्यान बुधवारी पहाटे त्याचा मृत्यू झाला. 

भिरंवडे प्राथमिक शाळा व कनेडी विद्यालयात शिक्षण पूर्ण केल्यानंतर त्याने बीएससी नर्सिंग पर्यंतचे शिक्षण पूर्ण केले होते. मुंबईतील एका खाजगी रूग्णालयात गणेश कदम हा रूग्णसेवा देता होता. काही दिवसांपूर्वी त्याला ताप येऊ लागला. त्याच्या तपासणीमध्ये डेंग्यू पॉझिटिव्ह असल्याचे निष्पन्न झाले होते. तो एकटाच मुंबईला राहत होता तर आई, वडिल व कुटूंबिय गावी राहत असल्याने रविवारी सकाळी तो भिरंवडे येथे आला होता. त्यानंतर कनेडी व कणकवली येथे खाजगी रूग्णालयात त्याच्यावर उपचार करण्यात आले होते. 

उपचारा दरम्यान मंगळवारी सकाळी त्याला अधिक त्रास होवू लागल्याने अधिक उपचारासाठी कुडाळ येथील रूग्णालयात दाखल करण्यात आले. तेथून अधिक उपचारासाठी त्याला गोवा बांबुळी रूग्णालयात दाखल करण्यात आले होते. रूग्णालयात उपचार सूरू असतानाच बुधवारी पहाटे  त्याचे निधन झाले. त्याच्यावर भिरंवडे येथील स्मशानभूमीत सायंकाळी अत्यसंस्कार करण्यात आले. त्याच्या पश्चात आई, वडिल, आजी, भाऊ, काका, काकी, बहिणी असा परिवार आहे. गणेश याचे तपासणी अहवाल डेंग्यू पॉझिटिव्ह असल्याचे आरोग्य कर्मचार्‍यांकडून कदमवाडीत  सर्व्हेक्षण करण्यात आले.