सावंतवाडी : मान्सूनपूर्व पावसाने सावंतवाडी शहरात गेल्या आठवडाभरापासून वीजेचा खेळखंडोबा सुरू असून नागरिक त्रस्त झाले आहेत. या पार्श्वभूमीवर ठाकरे सेनेचे आशिष सुभेदार यांनी आमदार दीपक केसरकर यांच्यावर जोरदार निशाणा साधला आहे. "आमदार दीपक केसरकर आता तरी मतदारसंघात या," अशी हाक सुभेदार यांनी त्यांना दिली आहे.
तसेच, एरव्ही प्रत्येक मुद्द्यावर आक्रमक भूमिका घेणारे शिवसेना जिल्हाप्रमुख व माजी नगराध्यक्ष संजू परब यांच्या भूमिकेवरही त्यांनी प्रश्नचिन्ह उपस्थित केले आहे.
गेल्या आठवडाभरापासून सावंतवाडी तालुक्यात मान्सूनपूर्व पावसाने हजेरी लावली आहे. या पावसामुळे अनेक ठिकाणी झाडे कोसळली असून, वीज वितरण कंपनीच्या ढिसाळ कारभाराचा फटका नागरिकांना बसत आहे. अनेक गावांमध्ये आणि शहराच्या काही भागांमध्येही तासनतास वीजपुरवठा खंडित होत आहे. यामुळे नागरिक हैराण झाले असून, संतप्त प्रतिक्रिया उमटत आहेत.
याच पार्श्वभूमीवर सुभेदार यांनी आमदार केसरकर यांच्या अनुपस्थितीवर प्रश्नचिन्ह उपस्थित केले आहे. "मतदारसंघातील जनता वीज समस्येने त्रस्त असताना आमदार साहेब कुठे आहेत? त्यांनी आता तरी मतदारसंघात येऊन नागरिकांच्या समस्या सोडवाव्यात," अशी मागणी सुभेदार यांनी केली आहे.
विशेष म्हणजे, सुभेदार यांनी यावेळी शिवसेना जिल्हाप्रमुख व माजी नगराध्यक्ष संजू परब यांच्या मौनावरही सवाल केला. "एरव्ही प्रत्येक छोट्या-मोठ्या मुद्द्यावर आगपाखड करणारे संजू परब आता वीजेच्या या गंभीर समस्येवर गप्प का आहेत?" असा सवाल करत सुभेदार यांनी परब यांच्या भूमिकेवर संशय व्यक्त केला.
वीज वितरण कंपनीच्या कारभारावरही सुभेदार यांनी तीव्र नाराजी व्यक्त केली आहे. पावसाळ्यापूर्वी दुरुस्तीची कामे न केल्यामुळेच वीजेचा खेळखंडोबा सुरू असल्याचा आरोप त्यांनी केला. तात्काळ वीजपुरवठा सुरळीत करावा अन्यथा ठाकरे सेना तीव्र आंदोलन करेल, असा इशाराही सुभेदार यांनी दिला आहे.
