कुडाळ : ग्रामपंचायत तेंडोली आणि कोकण कला व शिक्षण विकास संस्थेच्या संयुक्त विद्यमाने ग्रामपंचायत कार्यक्षेत्रातील नवोदित दुग्धव्यवसायिकांसाठी आज विशेष प्रशिक्षण कार्यक्रमाचे आयोजन करण्यात आले. मान्यवरांच्या उपस्थितीत दीपप्रज्वलन करून या उपक्रमाचा शुभारंभ झाला.
शेतीपूरक व्यवसायात दुग्ध उत्पादन हे महत्त्वाचे स्थान राखून आहे. योग्य प्रशिक्षण, सल्ला आणि मार्गदर्शनाद्वारे गोठा बांधणी, जनावरांचे वैज्ञानिक पद्धतीने पोषण, दूध उत्पादन वाढवण्यासाठी आवश्यक उपाय, तसेच नियमित लसीकरण यांसारख्या विषयांवर सखोल मार्गदर्शन करण्यात आले. या प्रशिक्षण कार्यक्रमामध्ये गावातील ५५ नागरिकांनी सहभाग नोंदवला. तसेच दुग्ध व्यवसाय करणाऱ्या ३५ व्यावसायिकांना प्लास्टिक घमेले वाटप करून त्यांना आवश्यक साहित्याची मदत करण्यात आली.
कार्यक्रमास उपसरपंच श्री. दिगंबर मुननकर, सदस्य श्री. कौशल राऊळ, संदेश प्रभू , पारकर, साक्षी राऊळ, उत्कर्षा प्रभू, प्रियांका परब, दुग्ध विकास सोसायटीचे चेअरमन अरविंद तेंडोलकर, पशुवैद्यकीय अधिकारी श्री. खवणेकर, सह-विकास सोसायटी चेअरमन संदीप पेडणेकर, माजी सरपंच मंगेश प्रभू, तलाठी श्रीमती भोगटे, प्रशिक्षक यशवंत पंडीत, श्री. मुननकर यांच्यासह अनेक मान्यवर उपस्थित होते.
ग्रामपंचायत अधिकारी श्रीमती सुनिता कदम यांनी उपस्थितांचे स्वागत करत कार्यक्रमाला शुभेच्छा दिल्या. सरपंच श्रीमती अनघा तेंडोलकर यांनी नवोदित व्यावसायिकांना प्रोत्साहनपर संदेश दिला. कार्यक्रमाचे सूत्रसंचालन संस्था समन्वयक समीर शिर्के यांनी केले.
