सावंतवाडी : गुरांची वाहतूक करणाऱ्या मालवाहू ट्रकसह पायलटींग करणाऱ्या इनोव्हा कारवर आंबोली पोलीसांनी धडक कारवाई केली आहे. आज सकाळी ७ वाजताच्या सुमारास ही कारवाई  करण्यात आली. यात कर्नाटक येथील चार जणांना ताब्यात घेण्यात आले असून ट्रक व इनोव्हा कारसह एकूण २९ लाख ८ हजाराचा मुद्देमाल जप्त करण्यात आला आहे. यावेळी सिंधुदुर्ग जिल्ह्यातून होणाऱ्या वाढत्या गो तस्करीबद्दल तीव्र नाराजी व्यक्त करत दाणोली लाठीवरून ही गाडी पुढे गेलीच कशी ? असा सवाल गो रक्षकांनी उपस्थित केला आहे. 

रविवारी सकाळच्या सुमारास गुरांनी भरलेला मालवाहू ट्रक (एम.एच.१०.झेड.०५६३) हा सावंतवाडी-आंबोली मार्गे कर्नाटक राज्यात जात होता. गुरांनी भरलेल्या या गाडीसह 1 किंग लोगो असणारी  इनोव्हा कार (के.ए.१९.एए.९१५७) पायलटींग करत होती. गुरांच्या कत्तलीसाठी सिंधुदुर्ग जिल्ह्यातून अशा प्रकारची तस्करी केला जाते. याआधी गोरक्षकांकडून असे प्रकार उघड करत संबंधितांना पोलीसांच्या स्वाधीन केले होते. आज आंबोली मार्गे कर्नाटकात जाणाऱ्या या गाडीची 

आंबोली चेक पोस्टला तपासणी केली असता त्यामध्ये तब्बल ९ बैल आढळून आले‌. हौद्याला प्लास्टिक बांधून ही तस्करी केली जात होती.यातली एक बैल हा जखमी अवस्थेत होता. दरम्यान, आंबोली पोलिसांनी गो तस्करी करणाऱ्या या दोन्ही गाड्यांसह कर्नाटक येथील चार युवकांना ताब्यात घेतले. इनोव्हा कार, ट्रकसह तब्बल २७ लाख ८ हजार आणि २ लाखांचे बैल असा मिळून एकूण २९ लाख ८ हजाराचा मुद्देमाल जप्त करण्यात आला. तर महाराष्ट्र प्राणी संरक्षण (सुधारणा) अधिनियम २०१५, प्राण्यांना कुरतेने वागवण्यास प्रतिबंध करण्याबाबतचा अधिनियम १९६०, महाराष्ट्र पोलीस अधिनियम कलम ११९ प्रमाणे, मोटार वाहन कायदा कलम-१८४ प्रमाणे या गुन्हयातील आरोपी सैफअली अयुबहुसैन मडीवाले, वय-३० वर्षे, रा. जळगाव पिरणवाडी, जिंदतनगर, ता.जि. बेळगाव, राज्य-कर्नाटक, अदनान रमजान बेपारी, य-२३ वर्षे, रा.घर नं.१८, कसाई गल्ली, कॅम्प, ता.जि. बेळगाव, राज्य-कर्नाटक, नविदअलीखान मोहम्मदअलीखान पठाण, वय-३२ वर्षे, रा. बेळगाव पिरणवाडी, ता.जि. बेळगाव, राज्य-कर्नाटक व इसा बहूद्दीन बेपारी, वय-२३ वर्षे, रा. घर नं.३६, बेळगाव मार्केट इस्टेट, ता.जि. बेळगाव यांच्यावर फौजदारी गुन्हे दाखल करण्यात आले. या चौघांनाही पोलीसांकडून ताब्यात घेण्यात आले आहे. मालवाहू ट्रकसह पायलटींग करणारी इनोव्हा कार सावंतवाडी पोलीस ठाण्यात जप्त करण्यात आली आहे. पोलिस निरीक्षक तानाजी नारनवर यांचा मार्गदर्शनाखाली पोलीस उपनिरीक्षक प्रमोद पाटील, पोलीस हवालदार दीपक शिंदे, पोलीस नाईक मनीष शिंदे, पोलीस हवालदार अभी कांबळी,पोलीस कॉन्स्टेबल आनंद बरागडे, पिरणकर यांनी ही धडक कारवाई केली आहे. तर जखमी बैलासह उर्वरीत बैल गोवा राज्यातील करासवाड- शिकेरी येथील गो शाळेत सुखरूप पाठवण्यात आले.

दरम्यान, याची माहिती मिळताच गोरक्षकांसह बजरंगदल, विश्व हिंदू परिषदचे पदाधिकारी, कार्यकर्ते यांनी सावंतवाडी पोलीस ठाण्यात धाव घेतली. यावेळी सिंधुदुर्ग जिल्ह्यातून वाढलेल्या गो तस्करीबद्दल तीव्र शब्दांत नाराजी व्यक्त केली. तर आंबोली पोलीस लाठीला पकडलेली गाडी दाणोली लाठीवरुन पुढे गेली कशी ? असा सवाल देखील गोरक्षकांनी यावेळी उपस्थित केला. शासनाने याकडे गांभीर्याने बघून गो तस्करीचे प्रकार तातडीने थांबवावेत अशी मागणी उपस्थितांनी केली.