सावंतवाडी : सामाजिक बांधिलकीच्या रूपा मुद्राळे आणि सामाजिक कार्यकर्ते सुशांत पांगम यांनी एका भीषण अपघातातील दोन जखमींना तातडीने रुग्णालयात दाखल करून त्यांना जीवदान दिले. गतिरोधकाचा अंदाज न आल्याने बांदा येथे झालेल्या अपघातात, गोव्याहून सोमवारच्या बाजारासाठी बांद्याला आलेले संतोष कुठेकर (वय ५०) आणि सानवी कुठेकर (वय ४७) हे गंभीर जखमी झाले होते.
सायंकाळी ६ च्या सुमारास हा अपघात घडला. जखमी व्यक्तींच्या गंभीर स्थितीमुळे त्या रस्त्यावरून जाणारे लोक आणि वाहन चालक मदत करण्यास किंवा आपले वाहन थांबवण्यास कचरत होते. याचवेळी, त्या मार्गाने जात असलेल्या रूपा मुद्राळे यांनी अपघात पाहिला आणि त्या तात्काळ मदतीसाठी धावल्या. त्यांनी जखमींना रुग्णालयात नेण्यासाठी अनेक वाहने थांबवण्याचा प्रयत्न केला, पण कोणीही मदतीसाठी पुढे येत नव्हते. या कठीण परिस्थितीत, बांदा येथील सामाजिक कार्यकर्ते सुशांत पांगम हे रूपा मुद्राळे यांच्या मदतीला धावले. कोणताही विलंब न लावता, पांगम यांनी आपल्या वाहनातून गंभीर जखमी असलेल्या दोघांनाही तात्काळ बांदा येथील हॉस्पिटलमध्ये दाखल केले. बांदा हॉस्पिटलमध्ये प्रथमोपचार दिल्यानंतर, अधिक उपचारांसाठी कुठेकर दांपत्याला तातडीने गोवा, बांबोळी येथे हलवण्यात आले आहे. रूपा मुद्राळे, सुशांत पांगम आणि त्यांच्या मित्रमंडळीने दाखवलेली ही त्वरित आणि माणुसकीची कृती अत्यंत कौतुकास्पद आहे. ॲम्ब्युलन्सची वाट न पाहता, त्यांनी दाखवलेल्या धाडसामुळेच या अपघातग्रस्तांना वेळेत उपचार मिळून त्यांचे प्राण वाचले आहेत. त्यांच्या या सामाजिक बांधिलकीच्या कार्याबद्दल सर्वत्र त्यांचे अभिनंदन होत आहे.
