सावंतवाडी : शहरातील मोती तलावाच्या शेजारील आर.पी.डी हायस्कूलमध्ये "आनंदोत्सव" २०२३ च आयोजन करण्यात आलं आहे. याचा शुभारंभ सावंतवाडीच्या युवराज्ञी श्रद्धाराजे भोंसले यांच्या हस्ते करण्यात आला. कोकणात प्रचंड टॅलेंट आहे. फक्त त्या टॅलेंटला वाव देण्याची गरज आहे असं मत श्रद्धाराजे यांनी व्यक्त केलं. "आनंदोत्सव" २०२३ च्या शुभारंभ प्रसंगी त्या बोलत होत्या.
गुरुवारी युवराज्ञी श्रद्धाराजे भोंसले यांच्या हस्ते या आनंदोत्सवचा शुभारंभ करण्यात आला. याप्रसंगी माजी जिल्हा परिषद अध्यक्षा रेश्मा सावंत, पौर्णिमा रविकांत सावंत आदी उपस्थित होते. प्रदर्शन व खरेदी अशा स्वरूपाचा हा आनंदोत्सव असून ३० डिसेंबर २०२३ पर्यंत तो चालणार आहे. दुपारी ३ ते रात्री ९ पर्यंत या आनंदोत्सवाचा आस्वाद घेता येणार आहे. यात डिझायनर कपड्यांसह मालवणी खाद्यपदार्थांची चव चाखता येणार आहे. तर ऐतिहासिक गंजिफा खेळ प्रत्यक्षात खेळण्याची संधी याठिकाणी उपलब्ध करून देण्यात आली आहे.या आनंदोत्सवामध्ये डिझायनर साड्या, डिझायनर कपडे, ज्वेलरी, इंटेरिअर प्रॉडक्ट्स, मसाले, टॅरो कार्ड रिडर, पॉटरी, पेंटीग्स, रेडीमेड ड्रेस, मालवणी खाद्यपदार्थ स्टॉल लाईव्ह पोट्रेट, कॅरिकेचर, टॅटु व मेहेंदी स्टॉल्स सावंतवाडीकरांसाठी पर्वणी ठरत आहे. सिंधुदुर्ग जिल्ह्यातील स्थानिक व्यावसायिकांसोबतच मुंबई आणि पुणे येथील स्टॉल पण यात सहभागी झाले असून या प्रदर्शनाला आवर्जून भेट द्या आणि या स्टॉल धारकांचा आणि आपला स्वतःचा आनंदही द्विगुणित करा असं आवाहन आयोजिका पौर्णिमा रविकांत सावंत यांनी केल आहे.