कणकवली : गोव्याच्या दिशेने जाणाऱ्या टेम्पो ट्रॅव्हलरची दुचाकीला धडक बसली. या अपघातात दुचाकीस्वार विनोद दिवाकर मोरये (३१, रा. नांदगाव-शिसयेवाडी) हा युवक गंभीर जखमी झाला. हा अपघात मुंबई-गोवा महामार्गावर नांदगाव येथे मंगळवारी सकाळी ७.३० वाजण्याच्या सुमारास झाला. अपघातास कारणीभूत ठरल्याप्रकरणी ट्रॅव्हलर चालक महेश राठोड (२८, रा. बेळगाव, कर्नाटक) याच्याविरोधात कणकवली पोलीस ठाण्यात गुन्हा दाखल करण्यात आला आहे.
ट्रॅव्हलर चालक महेश राठोड हा गोव्याच्या दिशेने जात असताना समोर असलेल्या, विनोद मोरये चालवत असलेल्या दुचाकीला ट्रॅव्हलरची जोरदार धडक बसली. या धडकेत दुचाकीस्वार विनोद मोरये हे जखमी झाला. त्यावेळीच संतोष बिडये मॉगिंनवॉक करून घरीत येत असता अपघात झाल्याचे त्यांना दिसून आले. अपघातस्थळी ते गेले असता विनोद बेशुद्धावस्थेत पडलेल्या दिसून आले. त्यानंतर त्यांनी ग्रामस्थांच्या मदतीने‌विनोद याला कणकवली उपजिल्हा रुग्णालयात दाखल केले. याठिकाणी प्राथमिक उपचार करून त्याला कणकवलीतील एका खासगी रुग्णालयात दाखल करण्यात आले. मात्र, त्यांची प्रकृती चिंताजनक असल्याने अधिक उपचारासाठी कोल्हापूर येथील रुग्णालयात हलविण्यात आले आहे.
याबाबत संतोष शिवा बिडये (४९, रा. नांदगाव-बिडयेवाडी) यांनी कणकवली पोलीस ठाण्यात फिर्याद दिली. त्यानुसार अपघातास करणीभूत ठरल्याप्रकरणी ट्रॅव्हलर चालक महेश राठोड याच्याविरोधात गुन्हा दाखल करण्यात आला आहे. तपास पोलीस हवालदार चंद्रकांत झोरे करीत आहेत.
