सावंतवाडी : ११ एप्रिल १८२७ रोजी महात्मा ज्योतिबा फुले यांचा जन्म झाला. एक प्रभावी मराठी लेखक, विचारवंत, समाजसुधारक, सामाजिक कार्यकर्ता, सत्यशोधक समाजाची स्थापना करणारे तसेच स्त्री शिक्षणाची मुहुर्तमेढ ज्यांनी रोवली असे महात्मा ज्योतिबा फुले यांच्या जयंती निमित्त कोकण कला व शिक्षण विकास संस्था आणि डॉ. आंबेडकर फाऊंडेशन यांच्या संयुक्त विद्यमाने श्री भाईसाहेब सावंत माध्यमिक विद्यालय, माजगाव, सावंतवाडी येथे विविध शैक्षणिक व सांस्कृतिक स्पर्धांचे उत्साहात आयोजन करण्यात आले. या कार्यक्रमाला तालुक्यातील विविध शाळांमधील विद्यार्थ्यांचा उत्स्फूर्त प्रतिसाद लाभला.
इयत्ता ५ वी ते ८ वी (लहान गट) व इयत्ता ९ वी ते ११ वी (मोठा गट) या दोन गटांमध्ये स्पर्धा घेण्यात आल्या. विद्यार्थ्यांमधील कला, विचारशक्ती, सर्जनशीलता, नेतृत्वगुण आणि राष्ट्रप्रेम वाढीस लागावे हा या उपक्रमाचा मुख्य उद्देश होता. या कार्यक्रमांतर्गत चित्रकला, निबंध लेखन, वक्तृत्व, वेशभूषा (फॅन्सी ड्रेस) आणि पोस्टर मेकिंग अशा पाच स्पर्धा घेण्यात आल्या. चित्रकला स्पर्धेत विद्यार्थ्यांनी ए-३ आकाराच्या कागदावर वॉटर कलरच्या सहाय्याने महात्मा फुले यांच्या जीवनप्रवासाचे प्रभावी चित्रण केले. निबंध स्पर्धेत त्यांच्या देशहितासाठीच्या कार्याचा सखोल आढावा विद्यार्थ्यांनी मांडला.वक्तृत्व स्पर्धेत विद्यार्थ्यांनी महात्मा फुले यांच्या नेतृत्वगुणांवर व राष्ट्रउभारणीतील योगदानावर अभ्यासपूर्ण विचार व्यक्त केले.
वेशभूषा स्पर्धेत भारतासाठी योगदान देणाऱ्या महान व्यक्तिमत्त्वांची भूमिका साकारून विद्यार्थ्यांनी उपस्थितांची दाद मिळवली. पोस्टर मेकिंग स्पर्धेत महात्मा फुले यांच्या विचारांचे प्रभावी सादरीकरण करण्यात आले. या कार्यक्रमाला वक्ते म्हणून माजी उपनगराध्यक्ष अन्नपूर्णा कोरगावकर, प्रा. डॉ. देविदास बोर्डे , प्रा. रुपेश पाटील यांनी महात्मा ज्योतिबा फुले यांच्या जीवन पैलूवर मार्गदर्शन केले. यावेळी श्री भाऊसाहेब चवरे (मुख्याध्यापक), श्रीमती प्राजक्ता गावडे (सहाय्यक शिक्षिका) व चंद्रशेखर सावंत (सहाय्यक शिक्षक) आदी मान्यवर उपस्थित होते. स्पर्धेतील प्रथम तीन विजेत्यांना ट्रॉफी,प्रमाणपत्र व आकर्षक बक्षीस देऊन गौरविण्यात आले. कार्यक्रमाचे प्रास्ताविक प्रथमेश सावंत यांनी केले, तर सूत्रसंचालन व आभार प्रदर्शन समीर शिर्के यांनी मानले. कोकण कला व शिक्षण विकास संस्था गेली १४ वर्षे सामाजिक शैक्षणिक व आरोग्य विषयक क्षेत्रात उल्लेखनीय कार्य करत असून कोकण संस्थेविषयी प्रा. रुपेश पाटील यांनी गौरोद्गार काढले व महात्मा ज्योतिबा फुले यांच्या जीवन प्रवासाविषयी विद्यार्थ्यांना मार्गदर्शन केले. प्रा. देविदास बोर्डे यांनी शिक्षण आणि समानता याविषयी विद्यार्थ्यांना मार्गदर्शन केले आणि श्रीम अन्नपूर्णा कोरगावकर यांनी अंधश्रद्धा आणि अन्यायाविरुद्ध कशाप्रकारे ज्योतीबांनी आवाज उठवला याबद्दल विद्यार्थ्यांना मार्गदर्शन केले
कार्यक्रमाच्या यशस्वी आयोजनासाठी कोकण संस्था प्रतिनिधी गौरी आडेलकर, रूचा पेडणेकर, हर्षदा कोरगावकर, वैष्णवी म्हाडगुत, तन्वी केसरकर व शुभम लोणाग्रे यांचे मोलाचे सहकार्य लाभले.
