सावंतवाडी : भारतीय जनता पक्षाचे युवा नेते विशाल प्रभाकर परब यांच्या वाढदिवसानिमित्त 'मेक ईन कोकण' या महत्त्वाकांक्षी उपक्रमाला चालना देण्यासाठी आयोजित करण्यात आलेल्या "उद्योग, व्यवसाय, रोजगार महोत्सव २०२५" चा शुभारंभ मोठ्या उत्साहात आणि थाटात पार पडला. पंतप्रधान नरेंद्र मोदी यांच्या "आत्मनिर्भर भारत" या संकल्पनेनुसार, बेरोजगार युवकांना व्यवसायाची दिशा मिळावी आणि स्थानिक उद्योजकांना त्यांच्या उत्पादनांसाठी मोठी बाजारपेठ उपलब्ध व्हावी या उदात्त उद्देशाने या महोत्सवाचे आयोजन करण्यात आले आहे.
बचतगटांच्या उत्पादनांपासून ते सर्व क्षेत्रांतील कोकणवासीय उद्योजकांच्या उत्पादनांना लोकांपर्यंत पोहोचवणारे हे भव्य प्रदर्शन व विक्री महोत्सव कोकणच्या आर्थिक विकासाला गती देणारे ठरणार आहे. या महोत्सवाचा प्रारंभ पद्मश्री परशुराम गंगावणे यांच्या शुभहस्ते फीत कापून करण्यात आला. त्यांच्या उपस्थितीने या सोहळ्याला विशेष महत्त्व प्राप्त झाले. वाढदिवसाच्या निमित्ताने केवळ शुभेच्छा न स्वीकारता, समाजसेवेला प्राधान्य देत कोकणाला 'आत्मनिर्भर' बनवण्याचा निर्धार युवा नेते विशाल परब यांनी व्यक्त केला. “मेक ईन कोकण” या अभियानाला व्यापक स्वरूप देण्याचा आणि स्थानिक उद्योजकांना प्रोत्साहन देण्याचा त्यांचा प्रयत्न या प्रदर्शनातून स्पष्टपणे दिसून येतो. सामाजिक बांधिलकी जपत त्यांनी आपल्या वाढदिवसाचे औचित्य साधून या विधायक उपक्रमाचे आयोजन केले आहे. या महत्त्वपूर्ण उद्घाटनप्रसंगी सावंतवाडी मंडल अध्यक्ष सुधीर आडीवरेकर, महिला मंडळ अध्यक्षा सौ. मोहिनी मडगावकर, माजी नगरसेवक राजू बेग, नगरसेविका सौ. दीपाली भालेकर, युवा मोर्चा अध्यक्ष हितेन नाईक, सरचिटणीस दिलीप भालेकर, सोशल मिडिया प्रमुख केतन आजगावकर, चिटणीस धीरेंद्र म्हापसेकर, शक्ती केंद्र प्रमुख अमित गवंडळकर, बूथ अध्यक्ष विजू साटेलकर, रंगनाथ गवस, शिरीष नाईक, सुकन्या टोपले, नयना सावंत, मेघना साळगावकर, अनुषा मेस्त्री, ज्योती मुद्राले यांच्यासह सावंतवाडीतील नागरिक, उद्योजक, युवा, कार्यकर्ते आणि पदाधिकारी मोठ्या संख्येने उपस्थित होते.
