दोडामार्ग : तिलारी येथे गोमांस वाहतुकीच्या संशयावरून झालेली मारहाण व कार जाळपोळ प्रकरणी येथील न्यायालयाने पन्नास हजार रुपयांच्या सशर्त जामिनावर मुक्तता केली आहे. सिताराम उर्फ राज राजन तांबे, महेश बाळू धर्णे व कलैया रुद्रय्या हिरेमठ अशी त्यांची नावे आहेत.
तिलारी येथे गोमांस वाहतूक करीत असल्याच्या संशयावरून काहींनी एकाला बेदम मारहाण करून त्याची कार जाळल्याची घटना २५ सप्टेंबर रोजी घडली होती. मारहाण झालेल्या व्यक्तीला त्याच्या कार सहित एक पोलीस कर्मचारी वरिष्ठांच्या आदेशानुसार पुढील कार्यवाही करण्यासाठी त्याला येथील पोलीस ठाण्यात आणत असताना हा प्रकार घडला होता. या पोलीस कर्मचाऱ्याच्या फिर्यादीवरून ५० ते ६० जणांवर पोलिसांनी गुन्हा दाखल करून यातील १६ संशयित आरोपींना पोलिसांनी ताब्यात घेतले होते. यातील सिताराम उर्फ राज राजन तांबे, महेश बाळू धर्णे व कलैया रुद्रय्या हिरेमठ या तिघांची येथील न्यायालयाने ५० हजार रुपयांच्या सशर्त जामीनावर मुक्तता केली आहे. संशयित आरोपींच्या वतीने ॲड. उमेश सावंत यांनी काम पाहिले.
