सावंतवाडी : दिवाळी निमित्त बी. एस. बांदेकर कला महाविद्यालयाच्या वतीने आयोजित करण्यात आलेल्या पारंपरिक आणि कलात्मक आकाश कंदील प्रदर्शन व विक्रीचे उद्घाटन सावंतवाडी संस्थानच्या युवराज्ञी श्रद्धाराजे भोसले यांच्या हस्ते उत्साहात करण्यात आले.
याप्रसंगी संस्थाध्यक्ष रमेश भट व संस्था सदस्य केदार बांदेकर, प्रकाश मसूरकर, श्याम भाट, प्राचार्य उदय वेले तसेच सामाजिक कार्यकर्ते ॲड. नकुल पार्सेकर आदींसह विद्यार्थी मोठ्या संख्येने उपस्थित होते.
या प्रदर्शनात कला महाविद्यालयातील विद्यार्थ्यांनी स्वतः तयार केलेले अनेक आकर्षक व कलात्मक कंदील विक्रीसाठी ठेवण्यात आलेत. यामध्ये पारंपरिक पद्धतीचे कंदील, दिव्याची रोषणाई, मातीचे, लाकडी, कापडी कंदील अशा विविध प्रकारच्या कंदिलांचा समावेश आहे. हे प्रदर्शन २७ ऑक्टोबरपर्यंत सकाळी १० ते सायंकाळी ७ या वेळेत सुरू राहणार आहे. कलाप्रेमींनी आणि नागरिकांनी या प्रदर्शनाचा लाभ घ्यावा व विद्यार्थ्यांना प्रोत्साहन द्यावे, असे आवाहन महाविद्यालयाकडून केले आहे.
