सावंतवाडी : वादळी पावसामुळे गोविंद चित्र मंदिर ते भटवाडी रस्त्यावर मोठ्या प्रमाणात झाडे आणि विजेचे खांब कोसळले होते. यापैकी काही खांब आणि नारळाची झाडे रस्त्यालगतच्या गटारात पडून होती. त्यामुळे वाहतुकीला मोठा अडथळा निर्माण होत होता. या ठिकाणी अनेक लहान-मोठे अपघातही झाले होते, ज्यामुळे नागरिकांमध्ये चिंतेचे वातावरण होते.
ही गंभीर बाब भटवाडी येथील बांधकाम व्यावसायिक आणि सामाजिक कार्यकर्ते बबन डिसोजा यांच्या लक्षात आली. त्यांनी तातडीने नगरपरिषद आणि एमएसईबी या दोन्ही विभागांचे लक्ष या समस्येकडे वेधले. त्यांनी केलेल्या आवाहनानंतर, तात्काळ कारवाई करत गटारात पडलेले खांब आणि झाडे हटवली. त्यांच्या या सतर्कतेमुळे भविष्यात होणारी मोठी वाहतूक कोंडी आणि अपघात टळले. बबन डिसोजा यांनी दाखवलेल्या या समयसूचकतेचे स्थानिक नागरिकांनी कौतुक केले असून त्यांच्या या प्रयत्नांमुळे रस्त्यावरील वाहतूक पुन्हा सुरळीत झाली आहे.
