सावंतवाडी : सावंतवाडी नगरपरिषदेच्या उपनगराध्यक्ष पदाची निवड प्रक्रिया आज संपन्न झाली. यात भारतीय जनता पक्षाचे उमेदवार ॲड. अनिल निरवडेकर यांनी त्यांचे प्रतिस्पर्धी शिवसेना नगरसेवक अजय गोंदावळे यांच्यावर विजय मिळवला. ॲड. अनिल निरवडेकर यांना १२ तर अजय गोंदावळे यांना ७ मते मिळाली.
काँग्रेसचे तौकीर शेख व उबाठाचे देवेंद्र टेमकर तटस्थ राहिले. बहुमत भाजपसोबत असल्याने ॲड. निरवडेकर यांना मुख्याधिकारी विनायक औंदकर यांनी विजयी घोषित केले.
सावंतवाडी नगरपरिषदेच्या उपनगराध्यक्ष पदासाठी आज नगराध्यक्षा श्रद्धाराजे भोंसले आणि भाजप युवा मोर्चा प्रदेश उपाध्यक्ष युवराज लखमराजे भोंसले यांच्या प्रमुख उपस्थितीत ॲड. अनिल निरवडेकर यांनी मुख्याधिकाऱ्यांकडे आपला अर्ज सुपूर्द केला होता. तर शिवसेनेचे नगरसेवक अजय गोंदावळे यांनीही आपला उमेदवारी अर्ज मुख्याधिकाऱ्यांकडे सादर केला होता.
दुपारी छाननी प्रक्रिया पार पडल्यानंतर दोन्ही अर्ज कायम राहिल्याने निवडणूक प्रक्रिया पार पडली. यात ॲड. अनिल निरवडेकर यांना नगराध्यक्षा श्रद्धाराजे भोंसले यांच्यासह नगरसेवक सुधीर आडीवरेकर, आनंद नेवगी, प्रतिक बांदेकर, दीपाली भालेकर, मोहिनी मडगांवकर, नीलम नाईक, वीणा जाधव, सुनिता पेडणेकर, दुलारी रांगणेकर, सुकन्या टोपले यांची मिळून एकूण १२ तर शिवसेनेच्या अजय गोंदावळेंना नगरसेवक संजू परब, बाबू कुडतरकर, देव्या सुर्याजी, शर्वरी धारगळकर, ॲड. सायली दुभाषी आणि स्नेहा नाईक यांची मिळून एकूण ७ मते मिळाली. तर काँग्रेसचे तौकीर शेख व उबाठाचे देवेंद्र टेमकर तटस्थ राहिले. हात उंचावून निवड प्रक्रिया पार पडली. यानंतर नगराध्यक्षा श्रद्धाराजे भोंसले यांनी ॲड. अनिल निरवडेकर हे विजयी झाल्याचे घोषित केले. यावेळी भाजपच्या नगरसेवकांनी त्यांचे अभिनंदन केले.
दरम्यान, स्वीकृत नगरसेवकपदी भाजपचे ॲड. सिद्धार्थ भांबुरे तर शिवसेनेच्यावतीने ॲड. नीता कविटकर यांची बिनविरोध निवड झाल्याचेही यावेळी नगराध्यक्षा श्रद्धाराजे भोंसले यांनी जाहीर केले. निवड जाहीर झाल्यानंतर भारतीय जनता पार्टीच्या पदाधिकारी व कार्यकर्त्यांनी एकच जल्लोष केला. यानंतर भाजपचे जिल्हा उपाध्यक्ष संदीप गावडे तसेच विनोद राऊळ यांच्यासह अन्य पदाधिकाऱ्यांनी उपनगराध्यक्ष ॲड. अनिल निरवडेकर व स्वीकृत नगरसेवक ॲड. सिद्धार्थ भांबुरे यांचे अभिनंदन केले. उपनगराध्यक्ष निवडीनंतर ॲड. अनिल निरवडेकर यांनी मुख्यमंत्री देवेंद्र फडणवीस, प्रदेशाध्यक्ष रविंद्र चव्हाण, खासदार नारायण राणे, पालकमंत्री नितेश राणे यांचे आभार मानले. तसेच भाजपचे युवा पदाधिकारी विनोद राऊळ यांचे विशेष आभार मानले. सर्वांना सोबत घेऊन सावंतवाडी शहराच्या सर्वांगीण विकासासाठी सर्वतोपरी प्रयत्न करू तसेच सावंतवाडी शहरात विकासाच्या माध्यमातून पक्ष संघटना वाढविण्याचे कामही करणार असा विश्वास त्यांनी व्यक्त केला.
