दोडामार्ग : तहसीलदार कार्यालय दोडामार्ग येथे मंगळवार दिनांक-०८ एप्रिल २०२५रोजी सकाळी ठिक ११. ०० वाजता दोडामार्ग तालुक्यातील ३६ ग्रामपंचायतीच्‍या प्रवर्गनिहाय सरपंच पदाचे आरक्षण सोडत पध्दतीने (चिठ्या काढून ) आरक्षण निश्चित केले जाणार असल्‍याची माहिती प्रसिध्‍दी पत्रकाव्‍दारे प्रभारी तहसीलदार पज्ञा राजमाने यांनी दिली.
महाराष्ट्र अधिनियम क्रमांक 21/1994 नुसार मुंबई ग्रामपंचायत अधिनियम 1958 मध्ये केलेल्या सुधारणेनुसार शासनाने मुंबई ग्रामपंचायत (सरपंच/उपसरपंच) निवडणूक 1964 मध्ये सरपंच पदाच्या आरक्षणाबाबत सुधारित तरतुदी निश्चित केलेल्या आहेत. सदर निवडणूक नियमातील नियम 2 (अ) (1) (2) पोट कलम 4 ते 6 मधिल तरतुदीनुसार अनुसूचित जाती, अनुसूचित जमाती, नागरीकांचा मागास प्रवर्ग व्यक्तीसाठी व महिला सरपंच आरक्षित करावयाची आहेत.मा.ग्रामविकास विभाग, मुंबई यांचेकडील महाराष्ट्र शासन राजपत्र, असाधारण भाग चार-य दिनांक ५ मार्च २०२५ व तसेच मा. जिल्हाधिकारी सिंधुदुर्ग यांजकडील पत्र क्र. साशा/डेस्क-1(3) / सरपंच आरक्षण/सोडत०३/२५ दिनांक -२८/०३/२०२५ अन्वये दोडामार्ग तालुक्यातील ३६ ग्रामपंचायतीतील सरपंच पदाचे प्रवर्गनिहाय आरक्षण निश्चित केले जाणार आहे.
सरपंच पदाच्या प्रवर्गनिहाय आरक्षणाची संख्‍या पुढील प्रमाणे असणार आहे. यामध्‍ये अनु.जमातीसाठी आरक्षित पदे प्रवर्ग १, महिला १, अनु.जातीसाठी आरक्षित पदे प्रवर्ग 0, महिला 0, नागरिकांच्‍या मागास प्रवर्गासाठी आरक्षित पदे प्रवर्ग ५ महिला ५ व खुला प्रवर्गामध्‍ये प्रवर्ग १२, महिला १२ अशाप्रकारे सरपंच पदाचे आरक्षण सोडत पध्दतीने (चिठ्या टाकून) आरक्षण निश्चित केले जाणार आहे. तरी दोडामार्ग तालुक्यातील सर्व संबंधीत सरपंच / उपसरपंच व ग्रामपंचायत सदस्य, लोकप्रतिनिधी, पदाधिकारी यांनी नोंद घेऊन वरील पदाचे आरक्षण बाबत चिठ्या टाकण्याच्या कार्यक्रमाच्या वेळी येथे उपस्थित रहाण्‍याचे आवाहन प्रभारी तहसीलदार पज्ञा राजमाने यांनी प्रसिध्‍दी पत्रकाव्‍दारे केली आहे.
