सिंधुदुर्ग : शिरुर (पुणे) येथील प्रा. केशवराव गाडेकर यांच्या तळेखोल (दोडामार्ग) आणि आचरा येथील शास्त्रीय संगीताच्या मैफलीमध्ये संगीत रसिक मंत्रमुग्ध झाले. दोन्ही ठिकाणी मैफलींना रसिकांचा उत्तम प्रतिसाद मिळाला.
मालवणी बोली अभ्यासक प्रा. डॉ. बाळकृष्ण लळीत यांनी या मैफलींचे आयोजन केले होते. प्रा. गाडेकर शिरुर येथील सी. टी. बोरा महाविद्यालयात मानसशास्त्र विभागाचे प्रमुख असुन ते 'संगीत अलंकार' परीक्षेत देशात दुसऱ्या क्रमांकाने उत्तीर्ण झाले होते. मुंबई, पुण्यासह अनेक ठिकाणी त्यांच्या मैफली झाल्या आहेत. चंद्रकांत निगडे (पुणे) यांनी हार्मोनियमवर, तर अशोक मोरे यांनी तबल्यावर साथ केली.
तळेखोल येथे गायनाचार्य रामकृष्ण बुवा वझे स्मृती संगीत संस्थेच्या वतीने अध्यक्ष गंगाराम विष्णू वझे यांच्या हस्ते प्रा. केशवराव गाडेकर यांचा व सहकारी अशोक मोरे, चंद्रकांत निगडे यांच्या शाल, श्रीफळ, स्मृतीचिन्ह देऊन देऊन सत्कार करण्यात आला. मनोज वझे व डॉ. बाळकृष्ण लळीत यांनी सूत्रसंचालन केले. तळेखोल येतील गणपत गवस, उत्तम गवस व ग्रामस्थानी विशेष सहकार्य केले. या संगीत सभेला मोठ्या संख्येने संगीत रसिक उपस्थित होते . संगीत कार्यक्रमापूर्वी वझरे येथील स्मृती स्मारकातील वझेबुवांच्या अर्धपुतळ्याला प्रा. गाडेकर यांच्या हस्ते पुष्पहार अर्पण करण्यात आला. कार्यक्रम आयोजनासाठी मनोज वझे यानी विशेष परिश्रम घेतले.
तळेखोल येथील कार्यक्रमात राग अहिरी तोडी मध्ये 'निस दिन तेरो ध्यान धरत हूॅं' ही विलंबित एकतालमधील आणि 'हरि हरि नाम जप लो मनुवाॅं' ही द्रुत तिनताल मधील या प्रमाणे दोन बंदिशी प्रा. गाडेकर यांनी सादर केल्या. 'घेई छंद मकरंद, प्रिय हा मिलिंद' हे 'कट्यार काळजात घुसली' या नाटकातील पद सादर केले. 'आवडे देवाशी तो ऐका प्रकार' ही एकनाथ महाराजांची रचना आणि 'तुज विन कोणा शरण जाऊ नारायणा' ही संत तुकाराम महाराजांची रचना हे दोन अभंग सादर केले. त्यानंतर श्रोत्यांनी केलेल्या आग्रहास्तव 'काटा रुते कुणाला' आणि 'हे सुरांनो चंद्र व्हा' ही दोन गीते सादर केली. शेवटी भैरवीमध्ये 'बैरन निंद कहासे आयी' हे संत कबीर महाराजांचे पद सादर केले.
आचरा येथील श्री देव इनामदार रामेश्वर मंदिरातील मैफलीची सुरुवात राग यमन मध्ये 'सुमिरन करू मैं तोरा, तु साहेब मेरा' ही विलंबित एकतालमधील बंदिश आणि 'चंद्रमा ललाट पर सोहे भुजंग गर' व 'दरशन दो शंकर महादेव' या दोन बंदिशी अनुक्रमे झपताल आणि तिनताल मध्ये सादर केल्या. राग गावती मध्ये 'डिम डिम डिम डमरू डिमक बाजे' ही रूपक तालातील आणि 'साजन आए मोरे द्वार सखी री' ही तिनताल मधील अशा दोन बंदिशी सादर केल्या. त्यानंतर 'जन्म वाया का दौडा रे, एका विठ्ठला शरण जा रे' हे संत नामदेव महाराजांचे पद आणि 'ओम नमो ज्ञानेश्वरा, करूणा करा दयाळा' हे संत एकनाथ महाराजांचे पद सादर केले. 'घेई छंद मकरंद प्रिय हा मिलिंद' हे कट्यार काळजात घुसली या नाटकातील पद सादर केले. शेवटी 'बैरन निंद कहासे आयये' हे संत कबीर महाराजांचे पद भैरवीमध्ये सादर केले.
इनामदार देव रामेश्वर चरणी त्रिपुरी पौर्णिमेला प्रा. गाडेकर यांनी केलेल्या संगीत सेवेपुर्वी संस्थानच्यावतीने कपिल गुरव यांनी शाल, श्रीफळ व प्रसाद देऊन सन्मानित करण्यात आले. या प्रसंगी 'घुंगुरकाठी'चे सतीश लळीत, साहित्यिक सुरेश ठाकुर, मंदार सांबारी व अन्य शास्त्रीय संगीत चाहते उपस्थित होते.
