सिंधुदुर्ग : महाराष्ट्र राज्य माध्यमिक व उच्च माध्यमिक शिक्षण मंडळाच्यावतीने फेब्रुवारी-मार्च 2026 मध्ये घेण्यात आलेल्या बारावी परीक्षेचा निकाल 2 मे 2026 रोजी जाहीर झाला. यात कुडाळ हायस्कूलची वाणिज्य शाखेची विद्यार्थिनी गायत्री विवेकानंद बागलकर हीने ९५.६७ टक्के गुणांसह जिल्ह्यात प्रथम क्रमांक पटकावला. तर सावंतवाडीच्या राणी पार्वती देवी हायस्कूल व ज्युनिअर कॉलेजच्या दत्तराज शैलेश पै याने ९५ टक्के गुणांसह जिल्ह्यात द्वितीय तर ९४.८६ टक्के गुणांसह मालवण तालुक्यातील वराडकर कनिष्ठ महाविद्यालयाच्या वाणिज्य शाखेची विद्यार्थिनी वैदेही पालकर तृतीय क्रमांकांची मानकरी ठरली‌.  

तसेच डॉन बॉस्को, ओरोस वाणिज्य शाखेची शुभ्रा युगलकिशोर प्रभुगावकर ९४.८३ टक्के व कुडाळ हायस्कूल वाणिज्य शाखेची पुनम दिनेश दळवी ९४.१७ टक्के गुणांसह जिल्ह्यात उत्तेजनार्थ ठरली. गुणवंत विद्यार्थ्यांवर सर्व स्तरातून अभिनंदनाचा वर्षाव करण्यात आला. यंदाही निकालात मुलींनी बाजी मारली असून राज्याचा निकाल 89.79 टक्के निकाल लागला. तर कोकण विभाग  94.14 टक्क्यांसह अव्वल राहीला. जिल्ह्यात नियमित विद्यार्थ्यांपैकी ८०२२ विद्यार्थ्यांनी नोंदणी केली होती. त्यापैकी ७९७३ विद्यार्थी परीक्षेला बसले आणि ७६५० विद्यार्थी उत्तीर्ण झाले. सिंधुदुर्ग जिल्ह्याचा एकुण निकाल 95.94 टक्के एवढा लागला आहे. पुनर्परीक्षार्थी गटात ६१ विद्यार्थ्यांनी नोंदणी केली होती. त्यापैकी ५९ विद्यार्थी परीक्षेला बसले आणि ३२ विद्यार्थी उत्तीर्ण झाले. या गटाचा निकाल ५४.२३% इतका नोंदवण्यात आला आहे.