सिंधुदुर्गनगरी : जिल्ह्यातील सर्व ग्रामपंचायतींनी आदिशक्ती अभियानात उत्स्फूर्त सहभाग नोंदवावा, असे आवाहन करत तालुकास्तरीय आदिशक्ती समितीमार्फत ग्रामपंचायतींनी केलेल्या स्वगुणांकनाची प्रत्यक्ष तपासणी करावी आणि तालुक्यात उत्कृष्टपणे अभियान राबविणाऱ्या तीन ग्रामपंचायतींचे प्रस्ताव जिल्हास्तरीय समितीकडे सादर करावेत, असे निर्देश जिल्हाधिकारी तृप्ती धोडमिसे यांनी दिले. सिंधुदुर्ग जिल्ह्यात राबविण्यात येत असलेल्या आदिशक्ती अभियानाचा आढावा घेण्यासाठी १५ डिसेंबर रोजी जिल्हास्तरीय समितीची बैठक आयोजित करण्यात आली होती. या बैठकीत ग्रामपंचायत स्तरावर आदिशक्ती पुरस्कारासाठी करण्यात आलेल्या स्वगुणांकनाचा सविस्तर आढावा घेण्यात आला. संबंधित ग्रामपंचायतींना प्रत्यक्ष भेटी देऊन त्यांनी केलेल्या कामांचे भौतिक निरीक्षण करण्यावर विशेष भर देण्याच्या सूचनाही जिल्हाधिकाऱ्यांनी दिल्या.
महिला स्नेही वातावरण निर्मिती प्रशिक्षण, सामूहिक विवाह सोहळ्यांचे आयोजन यांसारख्या महत्त्वाच्या निकषांकडे विशेष लक्ष देण्याचे निर्देश देत, या माध्यमातून जिल्ह्यातील ग्रामपंचायतींना राज्यस्तरीय आदिशक्ती पुरस्कार मिळवून देण्यासाठी प्रभावी मार्गदर्शन करण्यात येणार असल्याचे जिल्हाधिकारी धोडमिसे यांनी स्पष्ट केले. सिंधुदुर्ग जिल्हा महिला सुरक्षा, महिला हक्क व महिला सक्षमीकरणाच्या बाबतीत राज्यात अग्रेसर असल्याचे नमूद करत त्यांनी सांगितले की, बालविवाह, हुंडा प्रथा व कौटुंबिक हिंसाचार यांसारख्या अनिष्ट प्रथांचे प्रमाण जिल्ह्यात राज्याच्या तुलनेत कमी आहे. त्यामुळे आदिशक्ती अभियानांतर्गत जिल्ह्यातील गावांमध्ये राज्यस्तरीय पुरस्कार मिळविण्याची पूर्ण क्षमता असून, सर्व ग्रामपंचायतींनी सक्रिय सहभाग घ्यावा, असे आवाहनही त्यांनी केले. या बैठकीस जिल्हा ग्रामीण विकास यंत्रणेचे प्रकल्प संचालक उदय पाटील, जिल्हा आरोग्य अधिकारी डॉ. सई धुरी, जिल्हा कार्यक्रम अधिकारी (म.व.बा.वि.) मनोज पाटणकर यांच्यासह संबंधित विभागांचे अधिकारी उपस्थित होते.
