वेंगुर्ले : गेल्या काही वर्षात कर्करोगाच्या रुग्णांमध्ये मोठी वाढ झालेली असून, बऱ्याच वेळी उशिरा निदान झाल्यामुळे कर्करोगामुळे होणारे मृत्यूचे प्रमाण वाढत आहे. ह्याला प्रतिबंध घालण्यासाठी व कर्करोगाचे निदान ग्रामीण भागात लवकर होऊन , त्वरीत उपचार मिळावेत ह्या उद्देशाने आरोग्य सेवा महाराष्ट्र शासन मार्फत मोबाईल कॅन्सर निदान व्हॅन जिल्ह्यात दाखल झाली असून , दिनांक १७ जुलै रोजी प्राथमिक आरोग्य केंद्र परुळे, १८ जुलै उपजिल्हा रुग्णालय वेंगुर्ला, १९ जुलै रोजी उप जिल्हा रुग्णालय शिरोडा आणि २१ जुलै प्राथमिक आरोग्य केंद्र तुळस येथे, सकाळी ९ ते ४ या वेळेत उपलब्ध असणार आहे.

ह्या व्हॅन मध्ये स्त्रीरोग तज्ञ डॉ शेटकर, दंतशाल्यचिकित्सक डॉ मणेर, तसेच नर्सिंग स्टाफ उपलब्ध असून प्रामुख्याने मुखाचा कर्करोग, स्तनाचा कर्करोग व गर्भाशयाचा मुखाचा कर्करोग निदान करणेसाठी तपासणी करणेत येणार आहे.

तपासणी मध्ये गर्भाशयाच्या मुखाचा कर्करोग निदान साठी pap smear व VIA तपासणी, मुखाचा कर्करोग व स्तनाचा कर्करोग निदान करणेसाठी बायोप्सी  घेण्यात येणार असून , हिमोग्लोबीन व कॅन्सर मार्कर तपासणी ही केली जाणार आहे.

तपासणी अंती निदान झालेल्या रुग्णांना शासनामार्फत डेरवण येथील वालावलकर रुग्णालयात उपचारासाठी पुढील काळात संदर्भित केले जाणार आहे. तसेच यासोबत रुग्णांचे रक्तदाब, ब्लडसुगर तपासणी व आयुष्यमान कार्ड काढले जाणार आहे.

तरी वेंगुर्ला तालुक्यातील जनतेने तसेच लक्षणे असणाऱ्या रुग्णांनी याचा लाभ घ्यावा असे आवाहन तालुका आरोग्य अधिकारी डॉ रवींद्र लिलके व उपजिल्हा रुग्णालय वेंगुर्ला चे वैद्यकीय अधीक्षक डॉ संदीप सावंत ह्यांनी केले आहे.