सावंतवाडी : कुणकेरी गावचा हुडोत्सव शनिवारी ३० मार्चला होणार आहे. शुक्रवारी २९ मार्चला दुपारपासून प्रारंभ होणार आहे. महाराष्ट्रात पंढरपूरनंतर कुणकेरी गावातच हुडोत्सव होत असून १०० फुटी हुड्यावर चढणाऱ्या संचारित अवसरांच्या थरारासह भक्ती आणि शक्तीचा अनोखा संगम पाहण्यासाठी सिंधुदुर्गसह गोवा, कर्नाटकमधील भाविकांची अलोट गर्दी कुणकेरीत होते.
शुक्रवारी दुपारी २ वाजता गाव रोंबाट सुटणार असून त्यानंतर सायंकाळी ६ वाजता हुड्याजवळ सामुदायिक नारळ फोडण्यात येणार आहे. रात्री ९ वाजता घुमट वादनासह हुडा आणि होळीवर धूळ मारण्यात येणार आहे. रात्री १० वाजता गाव रोंबाट आणि रात्री ११ वाजता हुडा आणि होळीवर पेटत्या शेणी फेकून ढोल ताशांसह भाभीचे रोंबाट आणून नंतर कवळे व पेटत्या मशाली घेऊन हुडा आणि होळीभोवती फिरण्याचा कार्यक्रम होणार आहे. शनिवार हुडोत्सवाचा मुख्य दिवस असून या दिवशी सकाळपासून भावई देवीच्या निवासस्थानी तसेच मंदिरात देवीची ओटी भरणे, नवस फेडणे आदी कार्यक्रम होणार आहे. दुपारी २ वाजता मांडावरून रोंबाट सुटणार असून याचवेळी पळसदळा येथे आंबेगावच्या श्री देव क्षेत्रपाल निशाणाची भेट होणार आहे. त्यानंतर कोलगाव सीमेवर कलेश्वर देवस्थानची निशाण भेट होऊन सर्वजण भावई मंदिराकडे येणार आहे. सायंकाळी ४ वाजता हुड्याजवळ घोडे मोडणी व लुटुपुटुचा खेळ होणार असून सायंकाळी ५ वाजता अवसारावर दगड मारण्याच्या पारंपरिक कार्यक्रमाने हुडोत्सवाची सागता होणार आहे. या उत्सवाचा लाभ घ्यावा असे आवाहन स्थानिक देवस्थान कमिटी व कुणकेरी ग्रामस्थांनी केल आहे.
