कुडाळ : कुडाळ येथील बॅ. नाथ पै कॉलेज ऑफ फिजिओथेरपीचे प्रभारी प्राचार्य डॉ. प्रत्युषरंजन बिस्वाल यांना गोवा येथे नुकत्याच संपन्न झालेल्या 'इंडियन इंटरनॅशनल फिजिओथेरपी काँग्रेस' (IIPC) मध्ये प्रतिष्ठेचा 'फिजिओ आयकॉन अवॉर्ड' देऊन सन्मानित करण्यात आले आहे. फिजिओथेरपी क्षेत्रातील त्यांच्या अमूल्य योगदानाची दखल घेत त्यांना हा जागतिक स्तरावरील बहुमान देण्यात आला. 'इंडियन इंटरनॅशनल फिजिओथेरपी काँग्रेस' ही फिजिओथेरपी क्षेत्रातील एक अग्रगण्य संस्था आहे, जी जगभरातील तज्ज्ञ, चिकित्सक, शिक्षणतज्ज्ञ आणि संशोधकांना एका व्यासपीठावर आणून आरोग्यसेवेतील आधुनिक प्रवाहावर मंथन घडवून आणते. या परिषदेत आंतरराष्ट्रीय स्तरावरील वक्ते, प्रात्यक्षिक कार्यशाळा आणि वैज्ञानिक कार्यक्रमांचे आयोजन करण्यात आले होते.
'फिजिओ आयकॉन अवॉर्ड' हा IIPC चा सर्वोच्च सन्मान मानला जातो. या पुरस्कारासाठी उमेदवारांची निवड करताना त्यांचा संपूर्ण व्यावसायिक प्रवास, नैदानिक उत्कृष्टतेप्रती असलेले समर्पण, संशोधनातील नाविन्यपूर्णता आणि समाजासाठी दिलेले योगदान या बाबींचे मूल्यमापन ज्येष्ठ तज्ज्ञांच्या समितीकडून केले जाते. या कसोट्यांवर डॉ. बिस्वाल यांनी आपली छाप पाडत हा मानाचा पुरस्कार पटकावला.
या पुरस्काराबद्दल बोलताना डॉ. प्रत्युषरंजन बिस्वाल म्हणाले की, "इतक्या मोठ्या आंतरराष्ट्रीय व्यासपीठावर मिळणारा हा पुरस्कार माझ्या आजवरच्या कामाची पावती आहे. या पुरस्कारामुळे केवळ माझा गौरव झाला नसून, बॅ. नाथ पै फिजिओथेरपी कॉलेजची प्रतिष्ठाही उंचावली आहे. IIPC २०२६ च्या परिषदेत जागतिक नेत्यांशी झालेल्या संवादामुळे भविष्यातील सहयोगी संशोधन आणि प्रगत नैदानिक प्रशिक्षणासाठी नवीन मार्ग खुले झाले आहेत, ज्याचा फायदा आपल्या विद्यार्थ्यांना नक्कीच होईल. डॉ. बिस्वाल यांच्या या यशाबद्दल शिक्षण क्षेत्रातून आणि वैद्यकीय वर्तुळातून त्यांचे कौतुक होत आहे.
