कणकवली : कणकवली नगरपंचायत निवडणुकीसाठी रविवारी एकूण पाच अर्ज दाखल झाले. त्यामध्ये नगराध्यक्ष पदासाठी एक तर नगरसेवक पदासाठी चार अर्जांचा समावेश आहे. नगरसेवक पदासाठी अर्ज दाखल करणारे चारही जण भाजपचे आहेत.
नगराध्यक्ष पदासाठी लोकराज्य जनता पार्टीतर्फे गणेशप्रसाद राधाकृष्ण पारकर यांनी अर्ज दाखल केला. नगरसेवक पदासाठी प्रभाग २ मधून प्रतीक्षा प्रशांत सावंत, प्रभाग ९ मधून मेघा महेश सावंत, प्रभाग ११ मधून मयुरी महेंद्र चव्हाण, प्रभाग १३ मधून माजी उपनगराध्यक्ष बंडू उर्फ गणेश सोनू हर्णे यांनी अर्ज दाखल केला. सोमवारी अर्ज दाखल करण्याचा अंतिम दिवस आहे. सोमवारी माजी नगराध्यक्ष तथा उबाठा शिवसेना जिल्हाप्रमुख संदेश पारकर नगराध्यक्ष पदाचा अर्ज दाखल करणार आहेत. पारकर हे शहर विकास आघाडीच्या माध्यमातून लढत असून त्यांचे नगरसेवक पदाचे सर्व उमेदवारही सोमवारीच अर्ज दाखल करणार आहेत.
