सिंधुदुर्ग : जिल्ह्यात अवकाळी पावसामुळे झालेल्या भातशेतीच्या नुकसानीचे पंचनामे (Panchanama) सुरू असून, याचा आढावा पूर्ण होताच बाधित शेतकऱ्यांच्या खात्यात तातडीने मदत जमा केली जाईल, अशी ग्वाही पालकमंत्री नितेश राणे यांनी दिली आहे.

शेतकऱ्यांची दिवाळी गोड:

यावेळी बोलताना राणे यांनी सांगितले की, फळबाग विमा योजनेअंतर्गत (Fruit Crop Insurance) 90 कोटी रुपयांचे वाटप नुकतेच करण्यात आले आहे. या रकमेमुळे जिल्ह्यातील अनेक शेतकरी बांधवांची दिवाळी गोड झाली आहे.

मच्छीमार बांधवांनाही सवलतीचा लाभ :

मंत्री राणे यांनी यावेळी मच्छीमार (Fishermen) बांधवांसाठीही महत्त्वपूर्ण घोषणा केली. शेतकऱ्यांप्रमाणेच यावर्षी मच्छीमारांनाही विशेष सवलती देण्यात येणार आहेत.

शेतकऱ्यांप्रमाणेच आता मच्छीमार बांधवांनाही विजेच्या दरात सवलत देण्याचा निर्णय घेण्यात आला आहे. मासेमारीचे उत्पन्न घटत असल्यामुळे, त्यांचा खर्च कमी करण्याच्या उद्देशाने ही योजना राबवली जाणार आहे.

मत्स्यपालनाला 'कृषी'चा दर्जा मिळाल्यानंतर प्रत्यक्षात काय फरक पडला आहे, हे पाहणे महत्त्वाचे आहे. प्रत्येक बाबीसाठी आता वेगवेगळे शासन निर्णय (GR) काढून, मच्छीमारांना जास्तीत जास्त लाभ कसा मिळेल यावर आपले लक्ष असणार आहे, असे मत राणे यांनी व्यक्त केले.

शेतकऱ्यांना मिळणारे सर्व लाभ यापुढे मच्छीमार बांधवांनाही मिळतील, असे सूतोवाच नितेश राणे यांनी यावेळी केले. मच्छीमारांचा आर्थिक ताण कमी करून त्यांना मोठा आधार देण्याचा शासनाचा प्रयत्न असल्याचे त्यांनी स्पष्ट केले.