सिंधुदुर्ग : सिंधुदुर्ग जिल्ह्यातील शेतकरी सध्या रानगव्यांच्या वाढत्या उपद्रवामुळे हतबल झाले आहेत. पावसाळ्यात कोकणातील शेतकरी भात पिकाबरोबरच मोठ्या प्रमाणात फळभाज्यांची लागवड करतात. गणेश चतुर्थी आणि महालय (म्हाळवसा) पर्यंत त्यांना या पिकांचे चांगले उत्पन्न मिळते. मात्र, हाता-तोंडाशी आलेले पीक रानगव्यांचे कळप पूर्णपणे नष्ट करत असल्याने शेतकरी मेटाकुटीला आले आहेत.
कुडाळ तालुक्यात शेतकऱ्यांचे मोठे नुकसान
कुडाळ तालुक्यातील वारंग तुळसुली भागात रानगव्यांचा कळप स्थिरावला असून, यामुळे येथील शेतकऱ्यांचे अतोनात नुकसान झाले आहे. शेतकरी बाळा नाईक आणि शुभम नाईक यांच्या फळभाज्यांच्या पिकाची या कळपाने पूर्णपणे नासधूस केली आहे.
नाईक यांनी तीन ते चार एकर परिसरात काकडी, दोडकी, भोपळा आणि भेंडी यांसारख्या फळभाज्यांची लागवड केली होती. गणेश चतुर्थीच्या काळात या भाज्या बाजारात आल्या असत्या, पण त्याआधीच रानगव्यांनी हे पीक उद्ध्वस्त केले.
यामुळे लागलेला खर्चही वसूल होणार नाही, अशी हताश प्रतिक्रिया बाळा नाईक यांनी दिली आहे. शुभम नाईक यांनीही आपली व्यथा मांडली.
शेतकऱ्यांची सरकारकडे मदतीची मागणी
या गंभीर समस्येमुळे शेतकऱ्यांमध्ये संतापाचे वातावरण आहे. रानगव्यांच्या या उपद्रवामुळे शेती करणे कठीण झाले आहे. यावर तातडीने काहीतरी उपाययोजना करण्याची आणि शेतकऱ्यांना झालेल्या नुकसानीची भरपाई देण्याची मागणी शेतकरी शासनाकडे करत आहेत.
