दोडामार्ग : व्हॉलंटरी हेल्थ असोसिएशन ऑफ गोवा आणि डीएसव्ही चॅरिटेबल ट्रस्टच्या सहकार्याने दोडामार्ग तालुक्यातील केर गावात नुकताच शुभारंभ झालेल्या आरोग्य एक्सप्रेस ने आता व्याप्ती वाढवली आहे. ग्रामीण भागात सर्वसामान्य ग्रामस्थांना दर्जेदार आणि गावांत सेवा मिळावी म्हणून सुरु झालेला उपक्रम घोटगेवाडी ते हेवाळे गावापर्यंत पोहचला आहे. या तिन्ही गावांत मिळून विशेष शिबिरात 485 जणांची आरोग्य तपासणी झाली आहे. शिवाय दर महिन्याला आरोग्य तपासणी होणार तसेच अजूनही ग्रामीण गावांत सेवा दिली जाईल अशी माहिती कार्यक्रम व्यवस्थापक विकास कुलकर्णी यांनी दिली.

व्हॉलंटरी हेल्थ असोसिएशन ऑफ गोवा आणि डीएसव्ही चॅरिटेबल ट्रस्टच्या माध्यमातून दोडामार्ग तालुक्यातील तळेखोल, विर्डी  नंतर तिलारी खोऱ्यातील जनतेला मोफत आरोग्यसेवा मिळाव्यात यासाठी कार्यक्रम व्यवस्थापक विकास कुलकर्णी यांच्याकडे सामाजिक कार्यकर्ते वैभव इनामदार, पत्रकार तेजस देसाई यांनी मागणी केली होती त्यानंतर याबाबत सदर गावांचा सर्व्हे संस्थेकडून करण्यात आला. केर सरपंच रुक्मिणी नाईक, घोटगेवाडी सरपंच श्रीनिवास शेटकर, उपसरपंच सागर कर्पे, हेवाळे सरपंच साक्षी देसाई, उपसरपंच सौ.वैशाली विलास गवस, माजी उपसरपंच समीर देसाई यांच्याशी विशेष बैठका संपन्न झाल्या त्यानंतर ग्रामीण भागात आरोग्य सेवा देण्याचे नियोजन झाले.

या स्वयंसेवी आरोग्य संघटनेचे विकास कुलकर्णी (कार्यक्रम व्यवस्थापक), डेलिला परेरा (एचआर मॅनेजर) प्रवीण कांबळे (प्रकल्प कार्यकारी), आरती नाईक (प्रकल्प समन्वयक),डॉ. आकांक्षा मडकईकर (वैद्यकीय अधिकारी), डॉ. प्राची नाईक (वैद्यकीय अधिकारी), शकुंतला कवठणकर (परिचारिका), अंकिता सावंत (परिचारिका), गगन प्रियोलकर (फार्मसिस्ट), मंगलदास उस्तेकर (सहाय्यक), शंकरराव देसाई (डेटा कर्मचारी) अंजू अमरोस्कर (डेटा कर्मचारी), सागर गिरी (सहाय्यक) प्रशांत नाईक (सहाय्यक) हे उपस्थित राहून आरोग्य शिबीर नियोजन करत असतात. ग्रामस्थांना विनाशुल्क गावांत घरापर्यंत आरोग्य सेवा मिळावी यासाठी सुरु असलेल्या आरोग्य एक्सप्रेस शिबिरात सामान्य तपासणी ( रक्तदाब, साखर, वजन , इतर सामान्य आजार ), नेत्र तपासणी, रक्त तपासणी ( संपूर्ण रक्त घटक तपासणी , कोलेस्टेरॉल , सरासरी रक्त शर्करा , थायरॉइड )अस्थी घनता तपासणी ( वयोगट ३५ आणि पुढील ६५ वर्षांपर्यंत फक्त ) अशी तपासणी करण्यात आली.