सावंतवाडी : गांधी सप्ताहाच्या निमित्ताने अवैध दारूविक्रीविरोधात राज्य उत्पादन शुल्क विभागाने विशेष मोहीम हाती घेतली आहे. याचाच भाग म्हणून ३ ऑक्टोबर २०२५ रोजी राज्य उत्पादन शुल्क, भरारी पथक, सिंधुदुर्ग यांनी सावंतवाडी तालुक्यात मोठी कारवाई करत १६ लाख २९ हजार रुपयांचा गोवा बनावटीचा मद्यसाठा आणि दोन वाहने जप्त केली आहेत.
मिळालेल्या गोपनीय माहितीनुसार, भरारी पथकाने सापळा रचून दोन वेगवेगळ्या गुन्ह्यांमध्ये तपासणी केली. या कारवाईत दोन वाहनांमधून मोठ्या प्रमाणात गोवा बनावटीचा दारूसाठा हस्तगत करण्यात आला. जप्त केलेल्या मुद्देमालामध्ये ४ लाख २९ हजार रुपये किमतीचे गोवा बनावटीच्या विविध ब्रँडचे एकूण ४५ बॉक्स मद्यसाठ्याचा समावेश आहे. यासह, अवैधरित्या दारूची वाहतूक करण्यासाठी वापरलेली हुंडाई सेंट्रो झिंग कार (क्र. एम.एच.१५/बी.एक्स.१५८०) आणि जीप कंपास चारचाकी वाहन (क्रं. जी.ए.०३/वाय.१३६३) ही दोन वाहनेही जप्त करण्यात आली आहेत, ज्यांची अंदाजित किंमत १२ लाख रुपये आहे.
याप्रकरणी सांगली येथील दत्तात्रय भिमराव बंडगर (वय ५०) आणि कोल्हापूर येथील गजानन दिनकर पाटील (वय ४९) या दोन संशयित आरोपींविरोधात दारुबंदी कायद्यांतर्गत गुन्हा दाखल करण्यात आला आहे.
अधीक्षक किर्ती शेडगे यांच्या मार्गदर्शनाखाली, निरीक्षक एस. ए. जाधव आणि दुय्यम निरीक्षक एस. एन. पाटील यांच्या पथकाने ही कारवाई यशस्वी केली. जप्त केलेल्या मुद्देमालाबाबत आणि आरोपींविरोधात दुय्यम निरीक्षक एस. एन. पाटील पुढील तपास करत आहेत. राज्य उत्पादन शुल्क विभागाकडून अवैध दारूविक्रीविरोधातील ही मोहीम यापुढेही सातत्याने सुरू राहणार असल्याचे स्पष्ट करण्यात आले आहे.
