सावर्डे : सह्याद्री शिक्षण संस्थेचे संस्थापक,माजी खासदार स्व. गोविंदरावजी निकम साहेब यांच्या 90 व्या जयंतीनिमित्त  दिनांक 16 व 17 जानेवारी 2025 या कालावधीत सावर्डे येथील स्मृतिगंध या त्यांच्या स्मारक स्थळी जयंती महोत्सव सोहळा आयोजित करण्यात आलेला आहे. यानिमित्त 16 जानेवारी 2025 रोजी सकाळी साडेदहा वाजता जयंती महोत्सवानिमित्त सामाजिक, क्रीडा  अथवा  शैक्षणिक क्षेत्रात भरीव कामगिरी करणाऱ्या संस्थेस  शिक्षण महर्षी स्वर्गीय गोविंदराव निकम सह्याद्री पुरस्काराने सन्मानित केले जाते. 2025 चा हा पुरस्कार राजे सामाजिक प्रतिष्ठान गोवळकोटने आपल्या भरीव कामगिरीने प्राप्त केला असून त्याचे वितरण याच दिवशी केले जाणार आहे.

राजे प्रतिष्ठानच्या माध्यमातून छत्रपती शिवाजी महाराजांच्या विचारांचा प्रसार करून त्यांचा आदर्श समाजामध्ये रुजवण्याचे कार्य सुरू आहे. शैक्षणिक, सांस्कृतिक, क्रीडा व सामाजिक क्षेत्रामध्ये केलेल्या त्यांच्या कार्याचा ठसा समाजावर उमटत आहे. विशेषतः गड किल्ल्यांचे संवर्धन व त्यांना पूर्वीचे वैभव प्राप्त करून देण्यासाठी केलेले प्रतिष्ठानचे कार्य हे अत्यंत महत्त्वपूर्ण आहे. सामाजिक बांधिलकीचे भान जपून या प्रतिष्ठानने अनेक संकट समयी समाजाला अत्यंत महत्त्वाचे सहकार्य केले असून त्यांचे योगदान नक्कीच आदर्शवत आहे. प्रतिष्ठानच्या या कार्याची दखल घेऊन सन 2025 चा शिक्षण महर्षी स्व. गोविंदरावजी निकम सह्याद्री पुरस्कार त्यांना जाहीर करण्यात आला असून राजे प्रतिष्ठानला या निमित्ताने पद्मश्री व नेत्ररोगतज्ञ डॉ. तात्याराव लहाने, प्रसिद्ध उद्योजक मंदार भारदे, सह्याद्री शिक्षण संस्थेचे कार्याध्यक्ष व आमदार शेखर निकम,अध्यक्ष बाबासाहेब भुवड व विश्वस्त मंडळ यांच्या शुभहस्ते प्रदान करून सन्मानित करण्यात येणार आहे.

 या सोहळ्याप्रसंगी सह्याद्री शिक्षण संस्थेचे कार्याध्यक्ष व आमदार शेखर निकम, अध्यक्ष बाबासाहेब भुवड  व सर्व विश्वस्त मंडळ  यांची उपस्थिती लाभणार  आहे. या 90 व्या जयंती सोहळ्यास आपण बहुसंख्येने उपस्थित रहावे असे  संस्थेचे सचिव महेशजी महाडिक व सोहळा समिती आयोजकांकडून आवाहन करण्यात आले आहे.