कणकवली : 'वंदे मातरम्' या राष्ट्रगीताच्या रचनेला १५० वर्षे पूर्ण झाल्याच्या निमित्ताने महाराष्ट्र शासनातर्फे आयोजित करण्यात आलेल्या राज्यस्तरीय लोगो डिझाईन स्पर्धेत, येथील विजयालक्ष्मी विश्वनाथ दळवी महाविद्यालयाच्या मास मीडिया (BAMMC) विभागातील द्वितीय वर्षाचा विद्यार्थी कु. ओंकार अनंत कोळेकर याने खुल्या गटातून द्वितीय क्रमांक पटकावला आहे.
स्पर्धेचे स्वरूप आणि अनावरण
मंत्री मंगल प्रभात लोढा यांच्या संकल्पनेतून शालेय, महाविद्यालयीन आणि खुला अशा तीन गटांत ही स्पर्धा पार पडली. मुंबईतील नामांकित 'सर जे. जे. स्कूल ऑफ आर्ट'च्या तज्ज्ञ प्राध्यापकांनी या स्पर्धेचे परीक्षण केले. ७ नोव्हेंबर रोजी मुंबईत झालेल्या विशेष सोहळ्यात मुख्यमंत्री देवेंद्र फडणवीस यांच्या हस्ते या लोगोचे अधिकृत अनावरण करण्यात आले. याप्रसंगी वरिष्ठ प्रशासकीय अधिकारी व कला क्षेत्रातील मान्यवर मोठ्या संख्येने उपस्थित होते.
शैक्षणिक व व्यावसायिक पार्श्वभूमी
ओंकार कोळेकर याचे हे यश महाविद्यालयातील सैद्धांतिक व व्यावहारिक शिक्षण, तसेच त्याच्या सर्जनशीलतेला मिळालेल्या प्रोत्साहनाचे फळ आहे. ओंकारने यापूर्वी चित्रपट निर्मितीचे (Filmmaking) शिक्षण पूर्ण केले असून 'जिओ स्टुडिओ'मध्ये सिनेमॅटोग्राफर म्हणून अनुभव घेतला आहे. ग्राफिक डिझाईन क्षेत्रातही त्याने विविध नामांकित ब्रँड्ससाठी काम करून आपली व्यावसायिक ओळख निर्माण केली आहे.
डिझाईनचे वैशिष्ट्य ‘वंदे मातरम्’च्या १५० वर्षांच्या गौरवशाली प्रवासाला मानवंदना देणाऱ्या ओंकारच्या या लोगोमध्ये राष्ट्रभक्ती, सांस्कृतिक वारसा आणि आधुनिक ग्राफिक्स यांचा सुरेख संगम पाहायला मिळतो. साधेपणा आणि अर्थपूर्ण प्रतीकात्मकता यामुळे परीक्षकांनी त्याच्या संकल्पनेला विशेष पसंती दिली.
महाविद्यालयाकडून कौतुक ओंकारच्या या अभूतपूर्व यशाबद्दल महाविद्यालयाचे मानद मार्गदर्शक विनायक दळवी, महाविद्यालयाचे समन्वयक तथा मुंबई विद्यापीठाच्या सिंधुदुर्ग उपपरिसराचे प्रभारी संचालक श्रीपाद वेलींग, मास मीडिया विभाग प्रमुख प्रशांत हाटकर आणि सर्व शिक्षक व शिक्षकेतर कर्मचाऱ्यांनी त्याचे अभिनंदन केले आहे. कोकणातील विद्यार्थ्यांमधील सुप्त गुणांना योग्य दिशा मिळाल्यास ते राज्य आणि राष्ट्रीय स्तरावर आपली मोहोर उमटवू शकतात, हेच मास मिडिया विभागाच्या या यशातून अधोरेखित झाले आहे.
