सावंतवाडी : 'ऑन कॉल रक्तदाते संस्था, सिंधुदुर्ग' आणि 'सार्थक फाउंडेशन, गोवा' यांच्या संयुक्त विद्यमाने सावंतवाडी येथील काझी शहाबुद्दीन हॉलमध्ये आयोजित महारक्तदान शिबिरात एकूण ८५ रक्तदात्यांनी सहभाग घेत रक्तदान करून सामाजिक बांधिलकीचे दर्शन घडवले. या महारक्तदान शिबिराचे उद्घाटन सावंतवाडी संस्थानचे युवराज लखमराजे भोसले सावंत यांच्या हस्ते करण्यात आले.
याप्रसंगी व्यासपीठावर सावंतवाडी नगरपालिकेच्या मुख्याधिकारी सौ. अश्विनी पाटील, कार्यक्रमाचे अध्यक्ष तथा 'ऑन कॉल रक्तदाते संस्थे'चे अध्यक्ष तथा सेवानिवृत्त पोलीस उपविभागीय अधिकारी दयानंद गवस सार्थक फाउंडेशनचे संयोजक सुदेश नार्वेकर, गोवा येथील जेसीआय फाउंडेशनच्या सचिव सृष्टी लोटलीकर, सकल मराठा समाजाचे जिल्हाध्यक्ष सिताराम गावडे, पीएसआय माधुरी मुळीक, विश्व हिंदू परिषद गोरक्षक जिल्हाध्यक्ष दिनेश गावडे, मल्ल सम्राट प्रतिष्ठान सिंधुदुर्गचे ललित हरमलकर, लेडीज फिटनेस क्लबच्या दुर्गा सरनाईक, बाबली गवंडे यांच्यासह दोन्ही संस्थांचे पदाधिकारी व कार्यकारिणी सदस्य मोठ्या संख्येने उपस्थित होते. 'ऑन कॉल रक्तदाते' ही संस्था 'रक्तदान हे श्रेष्ठदान' या उदात्त हेतूने सिंधुदुर्ग जिल्ह्यात कार्यरत आहे. या संस्थेला गोवा येथील 'सार्थक फाउंडेशन' आणि 'जेसीआय फाउंडेशन' यांचे महत्त्वपूर्ण सहकार्य मिळत असल्याचे 'ऑन कॉल रक्तदाते संस्थे'चे अध्यक्ष दयानंद गवस यांनी आपल्या अध्यक्षीय भाषणात सांगितले. सिंधुदुर्ग जिल्ह्यातील रुग्णांच्या सेवेसाठी बांबुळी हॉस्पिटल नेहमीच तत्पर असते आणि हे हॉस्पिटल जिल्ह्यासाठी मोठ्या भावाप्रमाणे असल्याचेही गवस यांनी नमूद केले. मेडिकल कॉलेजच्या माध्यमातून रुग्णसेवेबरोबरच आरोग्य शिबिरे व रक्तदान शिबिरे सातत्याने घेतली जात असल्याचेही त्यांनी स्पष्ट केले.
यावेळी सार्थक फाउंडेशनचे श्री. नार्वेकर यांनी सिंधुदुर्ग जिल्ह्यातील नागरिकांसाठी नेहमीच सहकार्य करण्याच्या भावनेत असल्याचे सांगितले. 'ऑन कॉल रक्तदाते संस्था' उत्कृष्ट कार्य करत असून, त्यांचे अध्यक्ष व त्यांची संपूर्ण टीम सेवाभावी वृत्तीने काम करत आहे, हे कौतुकास्पद आहे. यामुळेच आम्ही विविध उपक्रम राबवत असल्याचे ते म्हणाले.
युवराज लखमराजे सावंत भोसले, मुख्याधिकारी अश्विनी पाटील, सिताराम गावडे, माधुरी मुळीक आदींनी 'रक्तदान हे श्रेष्ठदान' असून, 'ऑन कॉल रक्तदाते संस्था, सिंधुदुर्ग' अत्यंत चांगले कार्य करत असल्याचे गौरवउद्गार काढले. या संस्थेला सर्वांनी हातभार लावावा, ही संस्था निश्चितच पुढील काळात मोठे यश संपादन करेल, अशा शब्दांत त्यांनी संस्थेच्या कार्याची प्रशंसा केली.या शिबिरात गोवा येथे जाऊन रक्तदान केलेल्या 'ऑन कॉल रक्तदात्यां'चा सन्मानचिन्ह देऊन गौरव करण्यात आला. यावेळी गौरी फटनाईक, गिरीश सावंत, नितीन परब, गिरीश प्रभू, देवेश परब, ओंकार कोरगावकर, पप्पी कवठणकर, समीर सावंत, पंढरी सावंत, रणजित देसाई, ओंकार कवठणकर, श्रीकृष्ण राऊळ, जय मांजरेकर, रसिक दळवी यांचा सत्कार करण्यात आला. तसेच 'ऑन कॉल रक्तदाते संस्था, सिंधुदुर्ग' यांना सुद्धा सार्थक फाउंडेशनच्या वतीने सन्मानित करण्यात आले.यावेळी मोठ्या संख्येने रक्तदाते, रक्तमित्र, हितचिंतक आणि वडीलधारे व्यक्ती उपस्थित होते. कार्यक्रमाचे सूत्रसंचालन 'ऑन कॉल रक्तदाते संस्थे'चे कार्याध्यक्ष महेश रेमुळकर यांनी केले, तर प्रास्ताविक संस्थेचे सचिव बाबली गवंडे यांनी केले. कार्यकारिणी सदस्य दिनेश गावडे यांनी उपस्थितांचे आभार मानले. ऑन कॉल रक्तदाता संस्थेचे जिल्हाध्यक्ष दयानंद गवस होते. सार्थक फाऊंडेशनचे संयोजक सुदेश नार्वेकर, गोवा येथील जेसीआय फाऊंडेशनचे सचिव सुधीर लोटलिकर, सकल मराठा समाजाचे जिल्हाध्यक्ष सिताराम गावडे, महिला पोलीस अधिकारी सौ. माधुरी मुदलीक, विश्व हिंदू परिषद गोरक्षक जिल्हाध्यक्ष दिनेश गावडे, मल्हार सम्राट प्रतिष्ठान सिंधुदुर्गचे ललित हरमलकर, दुर्गा सरनाईक, बाबली गवंडे, मीनल सावंत, सिद्धार्थ पराडकर, बाळकृष्ण राऊळ, सचिन कोंडी, जितेंद्र पंडित, रवींद्र तावडे आदी उपस्थित होते.
