सिंधुदुर्ग : गावागावांतील जिल्हा परिषद शाळा टिकून राहिल्या पाहिजेत, तरच सर्वसामान्य घरातील मुलांना शिक्षण मिळेल, असे आवाहन बांबुळी ग्रामपंचायतीचे सरपंच प्रशांत परब यांनी एका कार्यक्रमात केले. सिंधुदुर्ग जिल्हा परिषदेचे मुख्य कार्यकारी अधिकारी यांच्या कल्पनेतून जिल्ह्यातील प्रत्येक जिल्हा परिषद शाळेत आयोजित करण्यात आलेल्या माजी विद्यार्थी स्नेह मेळाव्याच्या निमित्ताने ते बोलत होते.

त्याच अनुषंगाने, बांबुळी पूर्ण प्राथमिक शाळेत दिनांक ३ सप्टेंबर २०२५ रोजी माजी विद्यार्थी मेळाव्याचे आयोजन करण्यात आले होते. या कार्यक्रमात गावातील आजी-माजी विद्यार्थ्यांनी मोठ्या संख्येने हजेरी लावली.

काय आहे समस्या ?

सध्या सिंधुदुर्ग जिल्ह्यातील जिल्हा परिषद शाळांमध्ये विद्यार्थ्यांची पटसंख्या कमी होत आहे. त्यामुळे अनेक शाळा बंद पडण्याच्या मार्गावर आहेत. नोकरीच्या निमित्ताने अनेक पालक शहरात स्थायिक झाल्यामुळे त्यांची मुले तिथेच शिकतात, याचा परिणाम गावातील शाळांवर होत आहे. त्यामुळे गावातील शाळा कायमच्या बंद होतील अशी भीती पालकांना वाटत आहे.

यावर उपाय म्हणून, पालकांचे मनोधैर्य वाढवून त्यांना आपली मुले गावातच शिकवण्यासाठी प्रोत्साहित करण्याच्या उद्देशाने, जिल्हा परिषदेच्या मुख्य कार्यकारी अधिकाऱ्यांनी प्रत्येक शाळेत माजी विद्यार्थी मेळावा आयोजित करण्याचे आवाहन केले होते.

मेळाव्यातील महत्त्वाचे मुद्दे

या मेळाव्यात बांबुळी ग्रामपंचायतीने १५ व्या वित्त आयोगाच्या माध्यमातून शाळेला दोन टीव्ही संच आणि एक प्रोजेक्टर भेट दिले. यामुळे विद्यार्थ्यांना ई-शिक्षण प्रणालीद्वारे शिक्षण घेता येईल. यासोबतच, NEP-२०२० (नवीन शैक्षणिक धोरण) नुसार कौशल्य विकासावर आधारित शिक्षणाबद्दल मार्गदर्शन करण्यात आले.

या कार्यक्रमाला पंचायत समितीचे माजी सभापती अभय परब, सरपंच प्रशांत परब, उपसरपंच सुभाष बांबुळकर, ग्रामपंचायत सदस्य बच्चुजी मेस्त्री, शाळेचे मुख्याध्यापक मारुती गुंजाळ, शिक्षिका सौ. गायत्री धुरी, सौ. शिल्पा पिंगुळकर, देवस्थान कमिटीचे मानकरी आणि मुंबई मंडळाचे पदाधिकारी उपस्थित होते. कार्यक्रमाचे सूत्रसंचालन सौ. शिल्पा पिंगुळकर यांनी केले, प्रास्ताविक श्री. मारुती गुंजाळ यांनी केले, तर आभार सौ. गायत्री धुरी यांनी मानले.