सामाजिक बांधिलकीच्यावतीने 100 स्वच्छता दुतांचा सत्कार

Edited by: विनायक गांवस
Published on: August 16, 2025 13:08 PM
views 56  views

सावंतवाडी : स्वातंत्र्य दिनाचे औचित्य साधून नगरपरिषदेतील कंत्राटी सफाई कामगार व उपजिल्हा रुग्णालयातील सफाई कामगार अशा 100 स्वच्छता दुतांचा सत्कार सामाजिक बांधिलकी प्रतिष्ठानच्या वतीने करण्यात आला. तसेच त्यांना शिधावाटप देखील करण्यात आले. 


दरम्यान, हॉस्पिटल येथील महिला सफाई कामगारांना मायेची साडी देण्यात आली. तर दिव्यांग विद्यार्थ्यांसाठी संस्थेच्या रूपा गौंडर (मुद्राळे) यांच्या स्वखर्चाने भेटवस्तू देण्यात आल्या. संस्थेचे सल्लागार शैलेश पै यांच्या संकल्पनेतून हा उपक्रम राबवण्यात आला. या कार्यक्रमा प्रसंगी ते म्हणाले, हा सेवाभावी उपक्रम आता दरवर्षी स्वातंत्र्य दिनाला या आपल्या स्वच्छता दूतांसाठी घेतला जाईल. या शहराचे तेच खरे हिरो आहेत. जे स्वतःचे आरोग्य धोक्यात घालून आपलं आरोग्य व सावंतवाडी शहर स्वच्छ ठेवतात असे मत व्यक्त केले. तसेच सामाजिक बांधिलकी प्रतिष्ठानच्या अनेक सेवाभावी उपक्रमांचे त्यांनी कौतुक केले. शहरातच नव्हे तर आजूबाजूच्या शहरात देखील अशा पद्धतीने काम कोणीच करत नाही. तेवढं हे लोक 24 तास काम करतात. खरंच मला यांच्या कार्याच आश्चर्य वाटतं असंही ते म्हणाले.  यावेळी रेस्क्यू टीमचे अध्यक्ष बाबल अल्मेडा  गेली 40 वर्ष ते सामाजिक क्षेत्रामध्ये जीव तोडून काम करत आहेत. त्यांच्या या कार्याची दखल घेऊन संस्थेमार्फत त्यांचा सत्कार करण्यात आला. आरोग्य यंत्रणामधील 108 रुग्णवाहिका वरील 24 तास सेवा देणारे डॉक्टर दानवे यांचा सत्कार करण्यात आला. यावेळी ते म्हणाले, 24 तास ड्युटी करून मी फार हैराण झालो होतो. पाच महिन्यात पाचशेहून अधिक रुग्ण गोवा बांबुळी येथे 108 रुग्णवाहिकेने मी नेले. सततच्या ड्युटीमुळे काम सोडण्याचे ठरवले होते. त्यावेळी रवी जाधव मला भेटले व तुम्ही रुग्णांना खूप चांगली सेवा देत आहात आपण असा विचार करू नका. आम्ही तुमच्यासोबत आहोत असं सांगून त्यांनी माझा आत्मविश्वास वाढवला म्हणून आजपर्यंत मी या सेवेत आहे अशा भावना व्यक्त केल्या.


108 रुग्णवाहिका वरील सावंतवाडी शहरातील धैर्यशील शिर्के यांच्यासह रामचंद्र निकम आणि बुधाजी जाधव यांचाही सत्कार करण्यात आला. तसेच 24 तास सेवा देणारे सिटीस्कॅन मॅनेजमेंटचे मॅनेजर प्रथमेश परब यांचाही सत्कार करण्यात आला. दिव्यांग प्रशिक्षण केंद्र चालवणाऱ्या रूपाली पाटील तसेच काळसे पंचक्रोशी अपंग संस्थेचे अध्यक्ष विनोद धुरी तसेच शहरातील दानशूर व्यक्तिमत्व महालक्ष्मी सुपर बाजारचे मालक रामकृष्ण कोंडीयाल, चेतन बँगल स्टोअर्सचे मालक चेतन अशोक गुप्ता व उभा बाजार येथील सुराणा इंटरप्राईजेस यांचाही सत्कार करण्यात आला. सावंतवाडी शहराच्या नाट्य व सिनेमा क्षेत्रामध्ये शहराच मानबिंदू उंचवणाऱ्या अभिनेत्री लेखिका व कवयित्री कल्पना बांदेकर, जेष्ठ नागरिक माजी अध्यक्ष अरुण मेस्त्री, भारत भूषण पुरस्कार प्राप्त लक्ष्मण कदम यांचाही सत्कार करण्यात आला. यावेळी संदीप कोटकर यांचे विशेष आभार मानले. 

    

याकार्यक्रमा प्रसंगी कार्यक्रमाचे अध्यक्ष प्राध्यापक सुभाष गोवेकर व प्रमुख पाहुणे शैलेश पै यांनी उपस्थितांना संबोधित केले. संस्थेचे अध्यक्ष प्रा.सतीश बागवे, उपाध्यक्ष शैलेश नाईक, सचिव समीरा खालील, कार्याध्यक्ष संजय पेडणेकर, सदस्य रूपा गौंडर (मुद्राळे), लक्ष्मण कदम,शेखर सुभेदार, श्यामराव हळदणकर, हेलन निबरे व रवी जाधव या  संस्थेच्या कार्यकर्त्यांनी हा कार्यक्रम यशस्वीरित्या पार पडण्यासाठी बहुमूल्य कामगिरी केली. संस्थेचे अध्यक्ष सतीश बागवे यांनी आपल्या संस्थेमार्फत संकटात असलेल्यांना अनाथांना गोरगरिबांना जी सेवा दिली जाते ती सेवा अनंतकाळ टिकण्यासाठी आम्ही कटिबद्ध आहोत अशी ग्वाही दिली. तर संस्थेचे उपाध्यक्ष शैलेश नाईक कार्यक्रमाचे सूत्रसंचालन करून  सफाई कामगार तसेच दिव्यांगांच्या सदा पाठीशी आहोत असे सांगून त्यांचा आत्मविश्वास वाढवला. सत्काराला उत्तर देताना सफाई कामगार प्रतिनिधी बाबू बरागडे यांनी सामाजिक बांधिलकीच्या या उपक्रमाचे कौतुक केले. समाजसेवेचा झेंडा हाती घेऊन गोरगरीब - अनाथांना आपल्या अजेंड्याखाली घेऊन चालणारी ही संस्था आहे "जिथे कमी तेथे आम्ही"याच वाक्याप्रमाणे ही संस्था शहरांमध्ये सातत्य ठेवून काम करत आहे हे एवढं सोपं नसतं असे उद्गार अभिनेत्री लेखिका कल्पना बांदेकर यांनी काढले.