कुडाळ : आज कुडाळ तालुक्यात पाच दिवसांच्या गणपती बाप्पांचे विसर्जन अत्यंत भावपूर्ण वातावरणात पार पडले. गणेशभक्तांनी जड अंतःकरणाने आणि पाणावलेल्या डोळ्यांनी आपल्या लाडक्या बाप्पाला निरोप दिला.
गणपती बाप्पा आणि सिंधुदुर्ग जिल्ह्याचे नाते खूपच घट्ट आहे. गणेशोत्सवाच्या या पाच दिवसांमध्ये घरोघरी आणि सार्वजनिक मंडळांमध्ये उत्साहाचे वातावरण होते. बाप्पाची मनोभावे सेवा केल्यानंतर, आज भक्त त्याला निरोप देत होते. विसर्जन मिरवणुकीत 'गणपती बाप्पा मोरया, पुढच्या वर्षी लवकर या' चा जयघोष करत, ओल्या डोळ्यांनी बाप्पाला निरोप दिला गेला. ढोल-ताशांच्या गजरात आणि उत्साही वातावरणात मिरवणुका निघाल्या असल्या तरी, बाप्पाला निरोप देताना भक्तांमध्ये एक प्रकारची हळहळ स्पष्टपणे जाणवत होती.
या वर्षीचा गणेशोत्सव शांततेत आणि उत्साहात साजरा झाला. लहान मुलांपासून मोठ्यांपर्यंत सर्वांनी या उत्सवात सहभाग घेतला. लहान मुलांचे आणि बाप्पाचे नाते काही वेगळेच आहे. चतुर्थीच्या तयारीला लहान मुलेच पुढे असतात आणि कुटुंबातील सर्व सदस्य भक्तिमय वातावरणात रंगलेले असतात.
पुढच्या वर्षी बाप्पा पुन्हा लवकर यावा, याच आशेने आणि प्रार्थनेने सर्व भक्तांनी बाप्पाला निरोप दिला.
