सावंतवाडी : सावंतवाडी शहरातील सबनिसवाडास्थित श्री एकमुखी दत्त मंदिरात वैशाख शुद्ध द्वादशी, शुक्रवार, दिनांक ९ मे रोजी श्री टेंबेस्वामी पादुका मंदिराचा १०९ वा वर्धापन दिन मोठ्या उत्साहात साजरा होणार आहे. यानिमित्ताने मंदिरात विविध धार्मिक कार्यक्रमांचे आयोजन करण्यात आले आहे.
कार्यक्रमाची सुरुवात सकाळी ८ ते ९ या वेळेत एकादशी व अभिषेकने होईल. त्यानंतर सकाळी ९.३० वाजता श्री सत्यदत्त महापूजा आयोजित करण्यात आली आहे. दुपारी १२.३० वाजता श्रींची आरती होईल आणि त्यानंतर ठीक १ वाजल्यापासून भाविकांसाठी तीर्थप्रसादाची व्यवस्था करण्यात आली आहे.
सायंकाळच्या कार्यक्रमात सायंकाळी ७ वाजता श्रींची पालखी सोहळा पार पडेल, त्यानंतर आरती होईल. यानंतर स्थानिक दत्तगुरु भक्तांच्या भजनादी कार्यक्रमांचे आयोजन करण्यात आले आहे, ज्यामुळे वातावरण भक्तिमय होणार आहे.
श्री दत्तमंदिर आणि वासुदेवानंद सरस्वती मंदिर स्थानिक व्यवस्थापन समितीने सर्व भाविक भक्तांना या वर्धापन दिन सोहळ्याला उपस्थित राहून कार्यक्रमाची शोभा वाढवावी, असे नम्र आवाहन केले आहे. या महत्वपूर्ण धार्मिक कार्यक्रमात सहभागी होऊन श्री दत्तगुरू आणि श्री टेंबेस्वामींच्या चरणी नतमस्तक होण्याची संधी भाविकांना मिळणार आहे.
