वेंगुर्ले :  महाराष्ट्र शासनाने राज्यातील असंघटित बांधकाम कामगारांसाठी केलेल्या योजनेचा लाभ तळागाळातील सर्वसामान्य बांधकाम कामगारांना व्हावा. या दृष्टीने शालेय शिक्षण मंत्री दीपक केसरकर यांनी केलेल्या सूचनानुसार वेंगुर्ले शहरासह तालुक्यातील सर्वसामान्य बांधकाम कामगारांना या योजनेचा लाभ मिळवून देण्यासाठी शिवसेनेतर्फे असंघटित बांधकाम कामगारांची या योजनेसाठी मोफत नाव नोंदणी व मोफत नूतनीकरणासाठी कक्ष वेंगुर्ले तालुका शिवसेना कार्यालयात सुरु करण्यात आलेला आहे. या कक्षात वेंगुर्ले शहरासह तालुक्यातील असंघटित बांधकाम कामगारांनी शासनाच्या योजनेचा लाभ मिळवावा असे आवाहन शिवसेना शहरप्रमुख उमेश येरम यांनी केले.

वेंगुर्ले शहरातील सप्तसागर काँम्प्लेक्समधील शिवसेना तालुका संपर्क कार्यालयात मंगळवारपासून चालू करण्यात आलेल्या असंघटित बांधकाम कामगारांचा ऑनलाईन नोंदणी कक्षाचा शुभारंभ शिवसेना शहरप्रमुख यांचे हस्ते नोंदणीचे फाँर्म वितरित करुन झाला. याप्रसंगी व्यासपीठावर उपस्थित मान्यवरात शिवसेना तालुका प्रमुख नितीन मांजरेकर, वेंगुर्ला शहर महिला संघटक अँड. श्रध्दा बाविस्कर, अल्पसंख्यांक महिला शहर प्रमुख शबाना शेख, महिला संघटक मनाली परब, शहर युवक प्रमुख संतोष परब, बांधकाम कामगार प्रतिनिधी किरण कुबल, प्रभाकर पडते, संजय परब, बाळा परब यांचा समावेश होता.

बांधकाम कामगारांचे योजनेच्या लाभासाठी वय मर्यादा वाढविण्यासाठी प्रयत्न करणार

असंघटित बांधकाम कामगारांना 18 ते 60 वयोगटापर्यंत लाभ मिळतो. हा लाभ 60 वर्षानंतर पुढे मिळत नाही. हि बाब कांही बांधकाम कामगारांनी लक्षात आणून दिली आहे. त्यामुळे अशा 60 वर्षे उलटलेल्या बांधकाम कामगारांना 70 वर्षापर्यंत योजनेचा लाभ मिळवून देण्यासाठी शालेय शिक्षण मंत्री दिपक केसरकर यांच्या माध्यमातून राज्याचे मुख्यमंत्री एकनाथ शिंदे यांचेकडे प्रयत्न करुन न्याय दिला जाईल असे आश्वासन शिवसेना शहर प्रमुख उमेश येरम यांनी दिले.

    ग्रामसेवकांकडून दाखला देण्यास टाळाटाळीचा प्रश्न सोडविणार

असंघटीत बांधकाम कामगारांच्या नोंदणीसाठी लागणाऱ्या कागद पत्रात ग्रामसेवक दाखला लागतो तो देण्यास टाळाटाळ होते. या बांधकाम कामगारांच्या तक्रारीनुसार शिवसेना तालुका प्रमुख नितीन मांजरेकर व शहर प्रमुख उमेश येरम यांनी गटविकास अधिकारी यांची भेट घेऊन या विषयावर चर्चा केली असता आपण स्वतः लक्ष घालून हि समस्या सोडविन असे गटविकास अधिकारी यांनी स्पष्ट केले.

यावेळी बांधकाम कामगार प्रतिनिधी किरण कुबल यांनी बांधकाम कामगार नवीन नोंदणी व नुतनीकरण या संदर्भात लागणारी कागदपत्रे व योजनेत होणाऱ्या लाभा विषयी माहिती दिली. तर या योजनेत बांधकाम कामगारांच्या मुलांना शालेय शिक्षणासाठी या योजनेचा फायदा होतो असे स्पष्ट केले. या असंघटित बांधकाम कामगार आँनलाईन नोंदणीसाठी 80 जणांनी सहभाग घेत नोंदणी फाँर्म घेतले.

 या कार्यक्रमाचे प्रास्ताविक उमेश येरम यांनी तर उपस्थितांचे आभार महिला संघटक अँड. श्रध्दा बावीस्कर यांनी मानले. यावेळी शिवसेनेचे पदाधिकारी व कार्यकर्ते उपस्थित होते.