वेंगुर्ले : शिरोडा-केरवाडा येथील मच्छीमार सहकारी सोसायटीच्या १२ जागांसाठी झालेल्या पंचवार्षिक निवडणुकीत मच्छीमार हितवर्धक सहकारी पॅनलने १२ जागा जिंकून एकहाती विजय मिळवला आहे. या विजयानंतर शिवसेना जिल्हाप्रमुख संजू परब यांनी सर्व विजयी उमेदवारांचे अभिनंदन केले.
काल पार पडलेल्या या निवडणुकीत मच्छिमार हितवर्धक सहकारी पॅनलने आपले वर्चस्व प्रस्थापित केले. १२ जागांपैकी ३ जागा बिनविरोध निवडून आल्या होत्या, तर उर्वरित ९ जागांसाठी मतदान प्रक्रिया पार पडली. मच्छीमारांनी मच्छीमार हितवर्धक सहकारी पॅनलच्या उमेदवारांना भरभरून पाठिंबा देत त्यांना विजयी केले. यावेळी त्यांच्यासोबत जिल्हा समन्वयक सचिन वालावलकर, वेंगुर्ला तालुकाप्रमुख नितीन मांजरेकर, उपजिल्हाप्रमुख सुनील मोरजकर, संजय धुरी, कृष्णा चोपडेकर, शिरोडा माजी सरपंच मनोज उगवेकर आदी प्रमुख पदाधिकारी उपस्थित होते.
मच्छीमार हितवर्धक सहकारी पॅनलचे काशिनाथ नार्वेकर, दिलीप नाईक, संजय उगवेकर, पुंडलिक कुबल, नारायण लोणे, दिगंबर तांडेल, आत्माराम साळगावकर, मयुरेश तारी, प्रकाश नार्वेकर, सारिका नाईक, शिल्पा चोपडेकर, अन्विता नार्वेकर आदींनी विजय मिळवला आहे.
