सावंतवाडी : सावंतवाडी नगरपरिषदेची निवडणूक निर्णायक टप्प्यावर आली आहे.2 डिसेंबरला मतदान होणार असून आज उमेदवारी दाखल करण्यासाठी एक दिवस शिल्लक असताना शिवसेनेसह भारतीय जनता पार्टीच्या नगराध्यक्ष पदाच्या उमेदवारासह नगरसेवकांनी जोरदार शक्तीप्रदर्शन करत उमेदवारी अर्ज दाखल केले.
शिवसेनेकडून नगराध्यक्ष पदासह नगरसेवक असे एकूण 16 उमेदवारी अर्ज तर भाजपाकडून नगराध्यक्षांसह नगरसेवक असे एकूण 15 उमेदवारी अर्ज दाखल करण्यात आलेत. उबाठा शिवसेने देखील काही अर्ज दाखल केले. उर्वरित उमेदवारी अर्ज उद्या सोमवारी दाखल करण्यात येणार असल्याचे सांगण्यात आले. भाजपाकडून युवराज्ञी श्रद्धाराजे सावंत भोंसले या नगराध्यक्ष पदाच्या उमेदवार असल्याचे युवा नेते विशाल परब यांनी यावेळी जाहीर केले. तर दुसरीकडे भाजपाकडूनच इच्छुक असलेल्या अन्नपूर्णा कोरगावकर यांनी सुद्धा नगराध्यक्ष पदासाठी उमेदवारी अर्ज दाखल केला आहे. अपक्ष नामनिर्देशन देखील त्यांनी भरलं आहे. निवडणूक कक्षात माजी मंत्री आमदार दीपक केसरकर यांचेही त्यांनी आशीर्वाद घेतले. उमेदवारी अर्ज भरण्याचा शेवटचा दिवस असून शिवसेना, भाजपा, ठाकरे शिवसेना हे उर्वरित जागांसाठी तर काँग्रेस पक्षाकडून नगराध्य पदासह नगरसेवकांच्या जागावर उमेदवारी अर्ज दाखल करण्यात येणार असल्याचे सांगण्यात आले.
सावंतवाडी नगरपरिषदेच्या निवडणुकीला रंगत येऊ लागली आहे. उमेदवारी अर्ज भरण्यासाठी उद्या शेवटचा दिवस असताना आज रविवारी शिवसेनेच्यावतीने जोरदार शक्ती प्रदर्शन करण्यात आले. माजी मंत्री, आमदार दीपक केसरकर यांनी उमेदवारी अर्ज दाखल करण्याआधी श्री देव पाटेकर श्री देव उपरलकर यांचे आशीर्वाद घेऊन शहरातून रॅली द्वारे नगरपालिकेमध्ये उमेदवारांसह दाखल होत उमेदवारी अर्ज भरले. तर दुसरीकडे भारतीय जनता पार्टीकडून युवा नेते विशाल परब यांच्या नेतृत्वाखाली शक्तीप्रदर्शन करत उमेदवारी अर्ज दाखल करण्यात आले. सावंतवाडी नगरपालिकेच्या परिसरात उमेदवारासह पक्षाचे कार्यकर्ते मोठ्या संख्येने उपस्थित असल्याने मोठी गर्दी पाहायला मिळत होती. शिवसेनेकडून नगराध्यक्ष पदासाठी ॲड. नेता सावंत कविटकर यांनी उमेदवारी अर्ज दाखल केला. तर डमी म्हणून भारती मोरे यांनी उमेदवारी अर्ज भरण्यात आला. नगरसेवक पदासाठी दिपाली सावंत, सुरेंद्र बांदेकर, दुर्गेश सुर्याजी, संजना पेडणेकर, आरती सावंत, वैभव म्हापसेकर, गोविंद वाडकर, नासिर पटेल, ॲड. सायली दुभाषी, प्रसाद नाईक, उत्कर्षा सासोलकर, राहूल नाईक, गुरुप्रसाद मिशाळ, परिक्षीत मांजरेकर यांच्या माजी नगराध्यक्ष संजू परब, बाबु कुडतरकर, अजय गोंदावळे आदी सर्वांनी उमेदवारी दाखल केली. दुसरीकडे भाजपकडून नगराध्यक्ष पदासाठी युवराज्ञी श्रद्धाराजे सावंत भोंसले यांनी उमेदवारी दाखल केली. यावेळी राणीसाहेब शुभदादेवी भोंसले, अजय दौडीया, जयश्री दौंडीया, युवराज लखमराजे भोंसले आदी उपस्थित होते. तर नगरसेवक पदासाठी दिपाली भालेकर, सुधीर आडिवरेकर, राजू बेग, आनंद नेवगी, सुनिता पेडणेकर, उदय नाईक, मेघना राऊळ, मोहिनी मडगावकर, दुराली रांगणेकर, समृद्धी विर्नोडकर, प्रतिक बांदेकर, प्रेमानंद उर्फ बबन साळगावकर, सुकन्या टोपले, ॲड. अनिल निरवडेकर, वेदिका सावंत आदींनी उमेदवारी दाखल केली. माजी नगराध्यक्ष बबन साळगावकर यांनी भाजपातून उमेदवारी दाखल केली. तसेच भाजपाकडून नगराध्यक्ष पदासाठी इच्छुक असलेल्या अन्नपूर्णा कोरेगावकर यांनी स्वतंत्र कुटुंबासमवेत येत नगराध्यक्ष पदाची उमेदवारी दाखल केली. त्यांनी अपक्ष आणि भाजपा असे दोन उमेदवारी अर्ज दाखल केले.
यावेळी वडील श्रीरंग आचार्य, माजी नगरसेविका ॲड. पुष्पलता कोरगावर, व्यंकटेश शेट, ऐश्वर्या कोरगावकर, अखिलेश कोरगावकर आदी उपस्थित होते. दरम्यान उबाठाकडून शहर संघटक निशांत तोरसकर व शिप्रा सावंत यांनी उमेदवारी दाखल केली. उद्या उमेदवारी अर्ज भरण्याचा शेवटच्या दिवशी काँग्रेसकडून नगराध्यक्ष पदासाठी इच्छुक असलेल्या साक्षी वंजारी यांच्यासह नगरसेवक पदासाठी इच्छुक असलेले काही जणांकडून उमेदवारी दाखल करण्यात येणार आहे. तर शिवसेना आणि भाजपाच्या शिल्लक उर्वरित जागांसाठी उमेदवारी अर्ज दाखल करण्यात येणार आहे. एकूणच उमेदवारी अर्ज भरताना आज झालेल्या गर्दीमुळे सावंतवाडी नगरपरिषदेच्या निवडणुकीमध्ये रंगत वाढू लागली आहे.
