सावंतवाडी : सडेतोड बोलणारे बाळासाहेब आज आपल्यामध्ये नाहीत. मात्र, त्यांच्या विचारांवर चालणारी शिवसेना उद्धव बाळासाहेब ठाकरे यांच्या नेतृत्वाखाली काम करत आहे. 80 टक्के समाजकारण आणि 20 टक्के राजकारणाची शिकवण त्यांनी दिली. त्यांचा वारसा आणि वसा पुढे असाच शिवसैनिकांनी अविरत चालू ठेवावा. शिवसैनिकांनी पेटून उठून काम कराव असे आवाहन सावंतवाडी विधानसभा मतदारसंघ प्रमुख रुपेश राऊळ यांनी केले. बाळासाहेब ठाकरे यांच्या जयंतीनिमित्त ते बोलत होते.

हिंदुहृदयसम्राट सम्राट शिवसेनाप्रमुख बाळासाहेब ठाकरे यांची 99 वी जयंती उद्धव बाळासाहेब ठाकरे शिवसेनेच्या सावंतवाडी तालुका मध्यवर्ती कार्यालयात सावंतवाडी विधानसभा मतदारसंघ प्रमुख रुपेश राऊळ यांच्या हस्ते बाळासाहेब ठाकरे यांच्या प्रतिमेला पुष्पहार अर्पण करून झाला. यावेळी बाळासाहेब ठाकरे यांचा विजय असो, परत या परत या बाळासाहेब परत या, जय शिवाजी जय भवानी, छत्रपती शिवाजी महाराज की जयच्या घोषणा देण्यात आल्या.

सुरुवातीला रुपेश राऊळ यांच्या हस्ते दीप प्रज्वलन झाले. त्यानंतर छत्रपती शिवाजी महाराजांच्या प्रतिमेला त्यांच्या हस्ते पुष्पहार अर्पण करण्यात आला. त्यानंतर उपजिल्हाप्रमुख चंद्रकांत कासार यांच्या हस्ते शिवसेनाप्रमुख स्वर्गीय बाळासाहेब ठाकरे यांच्या प्रतिमेचे पूजन करण्यात आले. यावेळी जोरदार घोषणा देण्यात आला. या जयंती उत्सवासाठी तालुकाप्रमुख मायकल डिसोजा महिला, तालुका संघटक भारती कासार, जिल्हा संघटक शब्बीर मणियार, शहर संघटक श्रुतिका दळवी, फिलिप्स रॉड्रिग्ज, दिव्या पवार, संगीता पेडणेकर, कल्पना शिंदे, राजा वाडकर, हरेश नार्वेकर, निशिकांत तोरस्कर, अब्दुल रहिमान, राजू शेटकर, राजू काळे, नामदेव नाईक, गुरुनाथ नाईक, मंथन गवस, उत्तम पारधी, हेलन निबरे, सुनीता राऊळ आदी उपस्थित होते.

दरम्यान, स्वर्गीय बाळासाहेब ठाकरे यांच्या 99 व्या जयंती उत्सवानिमित्त कुडाळ तालुक्यातील झाराप येथील विशेष मुलांच्या आश्रमामध्ये धान्य व खाद्य पदार्थांचे वाटप करण्यात आले.