मंडणगड : शिगवण येथील स्मशानभूमीत बेकायदेशीर पध्तीने मोबाईल टॉवर उभा करणाऱ्या संबंधीत अधिकाऱ्यांवर कार्यवाही व्हावी या मागणीसाठी मंडणगड तालुका संघर्ष समितीचे अध्यक्ष अरविंद येलवे व सहकाऱ्यांनी 12 सप्टेंबर 2025 रोजी तहसिलदार अक्षय ढाकणे व पोलीस निरिक्षक नितीन गवारे यांच्याकडे निवेदन सादर केले.  चक्रवर्ती सम्राट अशोक नगर शिगवण येथील नागरिकांनी 21 ऑगस्ट 2025 रोजी गटविकास अधिकाऱ्यांना दिलेल्या पत्राच्या आधारे सादर समितीचेवतीने सादर करण्यात आलेल्या निवेदनातील माहीतीनुसार, ग्रुपग्रामपंचायत शिगवण यांच्या हद्दीमध्ये असलेले चक्रवर्ती सम्राट अशोक नगर व आदिवाडी वाडी शिगवण यांच्या पिढ्यानपिढ्या असलेल्या स्मशानभूमीत चुकीच्या पध्दतीने ग्रामपंचायत अधिकाऱ्यांनी ठराव मंजुर करुन स्वतःहाची मनमानी करत बी.एस.एन.एल. कंपनीचा मोबाईल टॉवर उभा करण्यासाठी परवानग्या दिल्या आहेत.

ही बाब ग्रामस्थांच्या लक्षात आल्यावर ग्रामस्थांनी 27 जून 2023 रोजी ग्रामपंचायतीला मोबाईल टॉवर उभारणीस हरकत घेण्याचे पत्र दिले आहे. टॉवर उभारणीस ग्रामस्थांची हरकत असल्याचे निवेदन गटविकास अधिकारी व तहसिल कार्यालयाकडे दिलेले असतानाही या विषयासंदर्भात कोणत्याही प्रकारची कार्यवाही केल्याचे दिसून आलेले नाही तरी मोबाईल टॉवर उभारणीचे कामी संबंधित सरपंच ग्रामसवेक अधिकारी यांची पंधरा दिवसाचे आत चौकशी करुन संबंधितांविरोधात कायदेशीर कार्यवाही करुन स्मशानभूमीत बेकायदेशीरपणे उभा करण्यात आलेला मोबाईल टॉवर तात्काळ हटवण्यात यावा अशी मागणी निवेदनात करण्यात करण्यात आली आहे.

मागणी मान्य करुन संबंधितांचे विरोधात कार्यवाही न झाल्यास बौध्द आणि आदिवासी समाजाच्या लोकांच्या भावनांशी खेळणाऱ्या लोकांचे विरोधात मोठ्या प्रमाणात जन आंदोलन करण्यात येईल आंदोलनामुळे होणाऱ्या सर्व परिणामांस विषया संबंधीत असलेले सर्व अधिकारी जबाबदार राहतील असा इशारा निवेदनात देण्यात आला आहे. निवेदनावर अध्यक्ष अरविंद येलवे सचिव रोहन राजविलकर कार्याध्यक्ष भरत सरपरे, सल्लागार अभय पिचुर्ले, विश्वास सुगदरे, ग्रामस्थ रजनिकांत धोत्रे, सचिन धोत्रे, मयुरेश धोत्रे. सिंकदर बुरुड यांच्या सह्या आहेत.