सावर्डे : विद्यार्थ्यांना स्वच्छ भारत ही संकल्पना अधिक दृढ व्हावी स्वच्छतेचे जीवनातील महत्त्व याची जाणीव होऊन त्याचा प्रसार व प्रसार घरोघरी व्हावा या उद्देशाने व विद्यार्थ्यांच्या अंगी असणाऱ्या उपजत कौशल्यांचा विकास व्हावा म्हणून गांधी तीर्थ स्वच्छता अभियान उपक्रमांतर्गत सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय आणि राष्ट्रीय मतदार दिन व स्वच्छ भारत या विषयावर आधारित रांगोळी स्पर्धेचे आयोजन केले होते.
इयत्ता आठवी ते बारावीच्या एकूण 25 गटांनी या उपक्रमात सहभाग नोंदवून उत्स्फूर्त प्रतिसाद दिला. विद्यार्थ्यांनी स्वच्छ भारत सुंदर भारत, स्वच्छ भारत निरोगी भारत व एक कदम स्वच्छते की ओर तसेच एकत्र या आणि मतदान करा, तुमचे मत तुमचा अधिकार यासारख्या विविध विषयांवर अतिशय सुंदर रांगोळ्या रेखाटल्या. या स्पर्धेत एकत्र या आणि मतदान करा या विषयावर रिया गुरव, समीरा शेलार, सई घाग यांच्या गटाने रेखाटलेल्या रांगोळीने प्रथम क्रमांक प्राप्त केला. स्वच्छ भारत या विषयावर समीक्षा कदम व गटाने रेखाटलेल्या रांगोळीने तृतीय क्रमांक प्राप्त केला तर एक कदम स्वच्छतेची ओर या विषयावर रेखाटलेल्या सार्थक घाणेकर व गटाने तृतीय क्रमांक प्राप्त केला.तुमचे मत तुमचा अधिकार या विषयावर रेखाटलेल्या गौरी चव्हाण व गटाने रांगोळीने उत्तेजनार्थ बक्षीस प्राप्त केले. या स्पर्धेचे परीक्षक म्हणून प्रख्यात रांगोळीकार दिलीप डंबे यांनी केले या उपक्रमाचे आयोजन संदीप पवार, गौरी शितोळे व दिशा विचारे यांनी केले.
विद्यार्थ्यांनी रेखाटलेल्या रांगोळ्यांचे कौतुक विद्यालयाचे प्राचार्य राजेंद्र वारे, उपप्राचार्य विजय चव्हाण, पर्यवेक्षक उद्धव तोडकर, सर्व शिक्षक व शिक्षकेतर कर्मचारी आणि विद्यार्थ्यांनी केले.
