सावंतवाडी : महायुतीतील भाजप, राष्ट्रवादी पक्ष आपली संघटना वाढवत आहे. देवेंद्र फडणवीस व अजित पवार यांच्या नेतृत्वाखाली ते कार्यरत आहेत. त्यामुळे आम्ही एकनाथ शिंदे यांच्या नेतृत्वाखाली आमचा पक्ष वाढवला तर इतरांना दुःख वाटायचं कारण नाही. स्थानिक स्वराज्य संस्थांवर महायुतीचा भगवा फडकवत असताना आपली संघटना सुद्धा वाढली पाहिजे ही माझी संपर्कमंत्री म्हणून भूमिका आहे. जिल्ह्यात आमचे दोन आमदार आहेत. त्यामुळे सिंधुदुर्ग हा शिवसेनेचा बालेकिल्ला आहे हे पुन्हा एकदा दाखवून देऊ असा विश्वास मंत्री उदय सामंत यांनी व्यक्त केला. तसेच जिल्हाप्रमुखपद सोडून इतर संघटना बरखास्त करत असल्याचे त्यांनी जाहीर केले.
शिवसेना संपर्कमंत्री तथा राज्याचे उद्योगमंत्री उदय सामंत यांच्या उपस्थितीत सावंतवाडी मतदारसंघातील शिवकार्य सदस्य नोंदणीचा प्रारंभ झाला. १ लाख सदस्य नोंदणीचा संकल्प यावेळी करण्यात आला. याप्रसंगी व्यासपीठावर शिवसेना जिल्हाप्रमुख दत्ता सामंत, जिल्हाप्रमुख संजू परब, संजय आंग्रे, संजय पडते, महिला जिल्हाप्रमुख अँड. निता सावंत-कविटकर, यशश्री सौदागर, तालुकाप्रमुख बबन राणे, नितीन मांजरेकर, गणेशप्रसाद गवस, सचिन वालावलकर,राकेश पावसकर, सुनील डुबळे, हर्षद डेरे, अर्चना पांगम, झेवियर फर्नांडिस, चेतना गडेकर आदींसह शेकडो पदाधिकारी, कार्यकर्ते उपस्थित होते.
मंत्री सामंत म्हणाले, आजची उपस्थिती बघून शिवसेनेची संघटना किती मजबूत आहे हे लक्षात येतं. विजयाची नांदी दोडामार्गातून आम्ही सुरू केली आहे. आमच्या ताकदीची अस्तित्वाची दखल इतरांना घ्यावी लागेल, तसंच काम अपेक्षित आहे. सभासद नोंदणीचा एक लाखाचा संकल्प आपण केलात. आपल्या पाठीशी आम्ही खंबीरपणे उभे आहोत. नारायण राणेंना ताकद देणारी मंडळी आज निलेश राणे, दीपक केसरकर यांना ताकद देत आहेत. एकनाथ शिंदे यांना लाडक्या महिला भगिनींची साथ आहे. त्यांची सभासद नोंदणी अधिक करावी असं आवाहन केल. दीपक केसरकर, निलेश राणे यांच्या नेतृत्वाखाली अनेक काम या जिल्ह्यात होत आहेत. मोठ्या प्रमाणात विकासनिधी या भागात येत आहे. सावंतवाडी व कुडाळ-मालवणला आपले आमदार आहेत. समन्वय समितीत झालेल्या निर्णयानुसारच सर्व गोष्टी होतील. तर जिल्ह्यातील प्रमुखपद सोडून इतर संघटना बरखास्त करत असल्याचे त्यांनी जाहीर केले. मानपान, नवा-जुना हा वाद न करता एकसंघपणे संघटना वाढीसाठी काम करा असं आवाहन श्री. सामंत यांनी केल. नितेश राणेंवर त्यांच्या पक्षाने रत्नागिरीची जबाबदारी दिली आहे. माझ्या पक्षानं सिंधुदुर्गची जबाबदारी मला दिली आहे. सिंधुदुर्गची सदस्य नोंदणी ही राज्यात सर्वात जास्त असेल असं काम करा, घरोघरी जाऊन नोंदणी करा असे आवाहन कार्यकर्त्यांना केलं. यावेळी जिल्हा बँक संचालक विद्याधर परब, अर्चित पोकळे, परिक्षीत मांजरेकर, सत्यवान बांदेकर, बंटी पुरोहित, प्रतिक बांदेकर, विनायक सावंत, शुभांगी सुकी, शर्वरी धारगळकर, दिपाली सावंत आदींसह पदाधिकारी, कार्यकर्ते उपस्थित होते.
राणेंच्या मुशीतला मी शिवसैनिक: संजू परब
उदय सामंत जिथे हात लावतात तिथे सोनं करतात. या मतदारसंघात संघटना मजबूत करण्याच काम आम्ही करू. काहीजण स्वबळाची भाषा करत आहेत. दोडामार्गात तीन सदस्य मागितले होते. मात्र, आम्हाला दिले नाहीत. आम्ही सहकारी संस्था पूर्णपणे ताब्यात घेत समोरांच्यांना एकही जागा जिंकता आली नाही. नारायण राणेंच्या नेतृत्वाखाली काम केलेला मी शिवसैनिक आहे. धमक आमच्यात पण आहे. सावंतवाडीच्या नगरपरिषदेत १७ पैकी १७ नगरसेवक आणि नगराध्यक्ष आमचाच असेल असा विश्वास व्यक्त जिल्हाप्रमुख संजू परब यांनी करत मित्रपक्ष भाजपच्या टीकेचा खरपूस समाचार घेतला. तसेच जिल्ह्यात आमचे दोन आमदार आहेत याचीही जाणीव ठेवा. हिंदुहृदयसम्राट बाळासाहेब ठाकरे, राणे-केसरकरांवर प्रेम करणारी जनता या मतदारसंघात आहेत. निश्चितच आगामी निवडणूकीत शिवसेना अग्रस्थानी राहील असा विश्वास त्यांनी व्यक्त केला.
