वेंगुर्ला : वेंगुर्ले बंदर येथे रात्री बुडालेली होडी आज सकाळी मूठ येथील समुद्रात सकाळी १० वाजण्याच्या सुमारास आढळली असून ती मच्छीमारांनी वेंगुर्ले बंदरात आणली आहे. दरम्यान या होडी मध्ये एकूण ७ खलाशी होते यातील ४ खलाशी बेपत्ता होते तर ३ खलाश्यानी आपले प्राण वाचवले आहेत. बुडालेल्या चार खलाशांपैकी रत्नागिरी येथील महादेव शंकर आंबेरकर वयः ६६ यांचा मृतदेह मोचेमाड समुद्रात मिळाला आहे. पोलिसांनी तो मच्छीमारांच्या सहाय्याने बाहेर काढून शवविच्छेदनासाठी वेंगुर्ले ग्रामीण रुग्णालयात पाठविला आहे.
कोस्टगार्डच्या हेलिकॉप्टर व बोटीद्वारे शोध कार्य सुरू
वेंगुर्ले बंदरात बुडालेल्या खलाशांच्या शोध साठी कोस्टगार्डच्या हेलिकॉप्टर व बोटीद्वारे शोध कार्य सुरू आहे. बंदरावर सर्व विभागांचे अधिकारी तसेच तहसीलदार ओकार ओतारी, फिशीरीज चे अधिकारी रवींद्र मालवणकर यांच्यासह अन्य अधिकारी उपस्थित आहेत.
तीन खलाशी पोहून आल्याने वाचले
समुद्र किनारी पोहत आलेले नंदा ठाकू हरिक्रांता वयः ४९, राजा कोल वयः २९ व सचिन कोल हे खलाशी पोहत आल्याने बचावले आहेत.
चार खलाशी बेपत्ता : एक मृतदेह सापडला
बेपत्ता असलेल्या मध्यप्रदेश येतील चार खलाशांपैकी तीन खलाशी अद्याप बेपत्ता त्यात आझान मुनीलाला कोल वयः १६, चांद गुलाम महम्म्द, व शिवराम कोल यांचा समावेश आहे. तर यातील चौथा रत्नागिरी येथील महादेव शंकर आंबेरकर वयः ६६ यांचा मृतदेह मोचेमाड येथे सापडला आहे.
