सावंतवाडी : माजी मंत्री स्व. एस् एन् देसाई यांच्या प्रयत्नातून आणि संकल्पनेतून बेचाळीस वर्षापूर्वी स्थापन झालेली कुडाळ औद्योगिक वसाहत. उद्योजकांच्या समस्या लक्षात घेऊन १९८८ मध्ये काही प्रमुख उद्योजकांनी एकत्र येवून कुडाळ एमआयडीसी इंडस्ट्रीज असोसिएशनची स्थापना केली. या इंडस्ट्री असोशिएशनच्या अध्यक्षपदी मोहन होडावडेकर तर कार्यवाह पदी ॲड. नकुल पार्सेकर यांची फेरनिवड करण्यात आली आहे.
मागच्या काही वर्षात असोसिएशनच्या पदाधिकाऱ्यांनी आपल्या क्षमतेनुसार काही प्रश्न मार्गी लावले. गेल्या पाच वर्षात अनेक नव उद्योजकांनी कुडाळ औद्योगिक वसाहतीत विविध प्रकारचे उद्योग सुरु केलेले आहेत. तीन वर्षापूर्वी मोहन होडावडेकर यांची असोसिएशनचे अध्यक्ष व अॅड. नकुल पार्सेकर यांची या कार्यवाह म्हणून निवड झाली. यांच्या नेतृत्वाखाली काही जुन्या व अनुभवी पदाधिकाऱ्यांना सोबत घेऊन उद्योजकांच्या महत्वाच्या प्रलंबित मागण्या पूर्णत्वास नेण्यासाठी सामुदायिक प्रयत्न केले. काही प्रश्न मार्गी लागले तर काही समस्या प्रलंबित आहेत. उद्योजकांसाठी सुरळीत व पूर्ण क्षमतेने विद्युत पुरवठा ही गरज लक्षात घेऊन गेल्या पस्तीस वर्षाहून जास्त काळ प्रलंबित असलेल्या वीज उपकेंद्राची प्रमुख मागणी मंजुर करुन घेण्यात असोसिएशनला यश मिळाले. संपूर्ण औद्योगिक वसाहतीत जुनाट पथदिवे वारंवार बंद पडत असल्याने काळोखाचे साम्राज्य होते. सुमारे साडे सहा कोटी रुपये यासाठी मंजुर होऊन औद्योगिक वसाहत प्रकाशमय झाली. सगळ्यात महत्वाचा प्रश्न म्हणजे मालाची ने आण करणारी अवजड वहाने ही औद्योगिक वसाहतीत जाताना रहदारीची मोठी समस्या होती. सुमारे अठरा कोटी रूपये रस्ता रुंदीकरणासाठी मंजूर होऊन सदर कामही पूर्णत्वास गेले. या सगळ्यासाठी उद्योगमंत्री. उदय सामंत, पालकमंत्री. नितेश राणे, आमदार निलेश राणे, संबधित खात्याचे अधिकारी तसेच इतर लोक प्रतिनिधींचे मोलाचे सहकार्य लाभले. पर्यावरण प्रेमी नागरिक व उद्योजक यांच्या सहकार्याने "ग्रिन एम्. आय्. डी.सी. क्लिन एम्. आय्. डी. सी." या संकल्पने अंतर्गत औद्योगिक वसाहतीत विविध प्रकारच्या पाचशे झाडांची लागवड करुन पर्यावरण पूरक उपक्रम यशस्वीपणे राबवला.
असोसिएशनच्या सर्व पदाधिकाऱ्यानी उद्योजकांच्या समस्या बरोबरच अनेक सामाजिक, शैक्षणिक व सांस्कृतिक उपक्रम गेल्या तीन वर्षात प्रभावीपणे राबवले. ६ ऑक्टोंबर २०२५ रोजी सपंन्न झालेल्या असोसिएशनचा वार्षिक सर्वसाधारण सभेमध्ये सर्व उद्योजक सभासदांनी पुन्हा एकदा श्री. होडावडेकर व. श्री. पार्सेकर यांच्यावर पुन्हा एकदा विश्वास व्यक्त करुन त्यांची पुढच्या तीन वर्षासाठी असोसिएशनची धुरा सांभाळण्यासाठी एकमताने निवड केलेली आहे. असोशिएशचे जेष्ठ सल्लागार द्वारकानाथ धुरी यांच्या मार्गदर्शनाखाली असोशिएशची त्रैवार्षिक निवडणुक प्रक्रीया पार पाडली. २०२५ ते २०२८ या कालावधीसाठी. नवीन कार्यकारीणी निवडण्यात आलेली असुन उपाध्यक्ष डॉ. नितीन पावसकर, आनंद बांदिवडेकर, सहकार्यवाह कुणाल ओरसकर, खाजिनदार संतोष राणे., सदस्य :- संजीव प्रभू, शशिकांत चव्हाण, प्रमोद भोगटे, हरिषचंद्र वेंगुर्लेकर, सुकरीन डीसोजा. कायम निमंत्रित उमेश गाळवणकर, अमित वळंजू, राजन नाईक, उदय शिरोडकर, दिलीप मालवणकर, मुश्ताक शेख, निलेश धडाम, किसन बिश्नोई, मंगेश तेर्से, हर्षवर्धन बोरडवेकर तर सल्लागार द्वारकानाथ धुरी, कमलाकांत परब, राजाराम गवस, अशोक मेस्त्री, लेखापरिक्षक सागर तेली, कार्यालयीन व्यवस्थाप्रमुख आग्नेल फर्नांडिस यांची निवड करण्यात आली आहे.
