सात वर्षांनी झालेल्या बैठकीत अधिकाऱ्यांची अनास्था
कुडाळ : तब्बल सात वर्षांच्या प्रदीर्घ कालावधीनंतर कुडाळ येथे आयोजित करण्यात आलेल्या आमसभेत सरकारी यंत्रणेचा ढिसाळ कारभार चव्हाट्यावर आला आहे. या महत्त्वपूर्ण बैठकीला दूरसंचार विभागाचे मुख्य अधिकारी 'जानू' यांनी दांडी मारल्याने आमदार निलेश राणे चांगलेच संतापले. त्यांच्या जागी उपस्थित असलेल्या प्रतिनिधीकडे विचारलेल्या प्रश्नांची समाधानकारक माहिती नसल्याने, आमदार राणेंनी संतप्त होत त्यांना तात्काळ सभागृहातून बाहेर काढले (हकालपट्टी केली).
जिल्ह्याच्या विकासाच्या दृष्टीने आमसभा अत्यंत महत्त्वाची मानली जाते. मात्र, या बैठकीत दूरसंचार विभागाच्या वरिष्ठ अधिकाऱ्यांची अनुपस्थिती आणि त्यांच्या जागी आलेल्या कनिष्ठ अधिकाऱ्यांकडे असलेल्या अपुऱ्या माहितीमुळे कामकाज प्रभावित झाले. सात वर्षांनी होत असलेल्या या बैठकीला गांभीर्याने न घेता, दूरसंचार विभागाचे जबाबदार अधिकारी उपस्थित नसल्याने आमदार निलेश राणे यांनी तीव्र नाराजी व्यक्त केली. अर्धवट माहिती देऊन आमसभेचा वेळ वाया घालवणाऱ्या अधिकाऱ्याला त्यांनी भर सभागृहात चांगलेच फटकारले.
यावेळी बोलताना आमदार निलेश राणे यांनी प्रशासनातील या अनास्थेवर कडक शब्दांत ताशेरे ओढले. राणे म्हणाले, "ही आमसभा तब्बल सात वर्षांनी होत आहे. अशा महत्त्वाच्या बैठकीला वरिष्ठ अधिकारी उपस्थित नसणे, हे प्रशासनाचे मोठे अपयश आहे. अशा बेजबाबदार अधिकाऱ्यांची गय केली जाणार नाही."
केवळ बैठकीला दांडी मारणाऱ्याच नव्हे, तर बैठकीत चुकीची किंवा अर्धवट माहिती सादर करणाऱ्या संबंधित अधिकाऱ्यांवर देखील कठोर कारवाई करण्याचे निर्देश आमदार राणे यांनी यावेळी दिले आहेत. या घटनेमुळे सरकारी अधिकाऱ्यांमध्ये खळबळ उडाली असून, प्रशासकीय वर्तुळात या कारवाईची मोठी चर्चा सुरू आहे.
