सावर्डे : महात्मा गांधीजींची तत्वे जगाला मार्गदर्शनिय असून आज त्याचा अत्यंत उपयोग होत आहे. गांधीजींनी आपल्या जीवनात स्वच्छतेला अतिशय महत्त्व दिले होते. आपल्या जीवनात वैयक्तिक स्वच्छतेसह सार्वजनिक ठिकाणी स्वच्छता ठेवण्यासाठी विद्यार्थ्यांनी प्रयत्नशील रहावे तरच जीवन निरोगी राहील. म्हणजेच गांधीजींचे विचार कृतीत आणले तरच देश विकास शक्य आहे असे प्रतिपादन विद्यालयाचे उपप्राचार्य विजय चव्हाण यांनी आपल्या मार्गदर्शनात केले.
महात्मा गांधीजी यांचा स्मृतिदिन म्हणजेच हुतात्मा दिननिमित्त सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालयात साजरा करण्यात आला. याप्रसंगी विद्यालयाचे प्राचार्य राजेंद्र वारे उपप्राचार्य विजय चव्हाण पर्यवेक्षक उद्धव तोडकर यांनी महात्मा गांधींच्या प्रतिमेचे पूजन करून अभिवादन केले.इयत्ता पाचवी ते दहावी विद्यार्थी, शिक्षक व शिक्षकेतर कर्मचारी यांनी स्वच्छता फेरी, शालेय परिसर स्वच्छता, वर्गस्वच्छता, सार्वजनिक ठिकाणांची स्वच्छता या उपक्रमाचे आयोजन केले. या स्वच्छता अभियानामध्ये विद्यार्थी,शिक्षक व शिक्षकेतर कर्मचारी यांनी उस्फुर्त सहभाग नोंदवला. सावर्डे गावचा सहान परिसर,बाजारपेठ बसस्थानक या ठिकाणी स्वच्छता अभियान राबविले. ओला कचरा व सुका कचरा वेगळा करून त्या कचऱ्याचा उपयोग सेंद्रिय खत निर्मितीसाठी केला आहे.
श्रमदान हे अतिशय श्रेष्ठदान असून प्रत्येक विद्यार्थ्याने आपल्या जीवनातील काही वेळ समाजाच्या उपयोगासाठी श्रमदान करणे गरजेचे आहे हे करत असताना कोणीही संकोच बाळगू नये. स्वच्छतेची जाणीव जागृती प्रत्येकाने आपल्या घरापासून करावी असे आवाहन अशोक शितोळे यांनी विद्यार्थ्यांना केले. विद्यार्थी मनोगतात अवनी कानसे, मृणाली घाणेकर, मुक्ता भुवड श्रावणी राठोड,युवराज रसाळ यांनी महात्मा गांधी यांच्या कार्याची माहिती विद्यार्थ्यांना दिली.उपस्थित सर्वांचे आभार मंगेश दाते यांनी मानले.
