सावंतवाडी : मळगाव येथील कै. प्रा. उदय रमाकांत खानोलकर वाचन मंदिरच्या कार्यकारी मंडळाची त्रैवार्षिक निवडणूक नुकतीच बिनविरोध पार पडली. या निवडणुकीत विद्यमान अध्यक्ष महेश रमाकांत खानोलकर यांची पुन्हा एकदा अध्यक्षपदी फेरनिवड करण्यात आली.
या बिनविरोध निवडणुकीमुळे वाचन मंदिराच्या कारभारात सातत्य राहणार असून, त्यांच्या नेतृत्वाखाली वाचन मंदिराची प्रगती सुरूच राहील अशी अपेक्षा व्यक्त केली जात आहे.
कार्यकारी मंडळाच्या या त्रैवार्षिक निवडणुकीत महेश रमाकांत खानोलकर यांच्यासह बाबली नारायण नार्वेकर, हेमंत शरद खानोलकर, सौ. स्नेहा महेश खानोलकर, शांताराम विठ्ठल गवंडे, चंद्रकांत भोजू जाधव, रितेश सत्यवान राऊळ हे सर्व संचालक बिनविरोध निवडून आले. या निवडणुकीसाठी हनुमंत वसंत मालवणकर यांनी निवडणूक निर्णय अधिकारी म्हणून जबाबदारी चोख बजावली.
कै. प्रा. उदय रमाकांत खानोलकर वाचन मंदिर हे मळगाव परिसरातील एक महत्त्वाचे सांस्कृतिक केंद्र आहे. या संस्थेच्या माध्यमातून वाचन संस्कृती वाढवण्यासाठी आणि स्थानिक पातळीवर शैक्षणिक व सामाजिक उपक्रम राबवण्यासाठी सातत्याने प्रयत्न केले जातात. महेश खानोलकर यांच्या नेतृत्वाखाली यापुढेही हे कार्य अधिक गतीने सुरू राहील, अशी आशा ग्रामस्थांकडून व्यक्त होत आहे.
