कुडाळ : दहावी आणि बारावीच्या बोर्ड परीक्षांचे निकाल लागण्यापूर्वीच विद्यार्थी आणि पालकांमध्ये 'पुढे काय?' या प्रश्नावरून चिंतेचे वातावरण असते. मुलाचा कल नेमका कशात आहे? त्याला कोणत्या शाखेत प्रवेश दिल्यास त्याचे भविष्य उज्वल होईल? या प्रश्नांची वैज्ञानिक उत्तरे देण्यासाठी महाराष्ट्र नॉलेज कॉर्पोरेशन लिमिटेड (MKCL) सरसावले आहे. ठाण्यातील प्रसिद्ध 'इन्स्टिट्यूट फॉर सायकॉलॉजिकल हेल्थ' (IPH) यांच्या सहयोगाने 'Future Vedh Career Inclination Test' हा विशेष उपक्रम आता अधिकृत MS-CIT केंद्रांवर मोफत उपलब्ध करून देण्यात आला आहे.

अनेकदा विद्यार्थी मित्रांच्या प्रभावाखाली किंवा पालकांच्या दबावाखाली एखाद्या शैक्षणिक प्रवाहाची (Stream) निवड करतात. मात्र, नंतर त्या विषयात रस न वाटल्यामुळे शैक्षणिक प्रगती खुंटते. हे टाळण्यासाठी 'फ्यूचर वेध' चाचणी एक 'सायंटिफिक अप्रोच' म्हणून समोर आली आहे. गेल्या २० वर्षांचा प्रदीर्घ अनुभव असलेल्या MKCL आणि IPH या संस्थांनी विकसित केलेली ही चाचणी विद्यार्थ्याच्या सुप्त गुणांचा शोध घेते.

ही केवळ सामान्य प्रश्नमंजुषा नसून, ती विद्यार्थ्याच्या बुद्धिमत्तेचे आणि व्यक्तिमत्त्वाचे सात स्तरांवर परीक्षण करते: क्षमता चाचणी: यामध्ये संख्यात्मक (Numerical), यांत्रिक (Mechanical), अवकाशीय (Space), शाब्दिक (Verbal) आणि अमूर्त (Abstract) तर्कशक्तीचा समावेश आहे.

मानसशास्त्रीय कल: विद्यार्थ्याचे व्यक्तिमत्त्व (Personality) आणि त्याच्या मूळ आवडीनिवडी (Interests) कशात आहेत, याचा शोध घेतला जातो.

कशी द्याल ही चाचणी? (संपूर्ण प्रक्रिया)

विद्यार्थ्यांच्या सोयीसाठी ही चाचणी अत्यंत सोप्या पद्धतीने उपलब्ध करून देण्यात आली आहे:

 विद्यार्थ्यांनी आपल्या जवळच्या कोणत्याही अधिकृत MS-CIT किंवा KLiC केंद्राला भेट देऊन आपली नोंदणी करणे आवश्यक आहे.

लॉगिन क्रेडेंशियल्स: नोंदणी पूर्ण झाल्यावर केंद्राकडून 'युजरनेम' आणि 'पासवर्ड' दिला जाईल.

ऑनलाइन परीक्षा: विद्यार्थी https://fv.examlive.org या पोर्टलवर जाऊन स्वतःच्या वेळेनुसार (डेस्कटॉप, लॅपटॉप किंवा मोबाईलवर) ही चाचणी देऊ शकतात.

भाषा: ही चाचणी मराठी आणि इंग्रजी अशा दोन्ही भाषांत उपलब्ध आहे.

सविस्तर अहवाल (Report): ७ पेपर्सची ही २ तासांची चाचणी पूर्ण केल्यावर, विद्यार्थ्याला एक सविस्तर रिपोर्ट मिळेल. हा रिपोर्ट त्याच्यासाठी सर्वात योग्य असणारे करिअर मार्ग सुचवेल.

पालकांसाठी सुवर्णसंधी

आजच्या स्पर्धात्मक युगात केवळ पदवी मिळवणे पुरेसे नसून, कौशल्य आणि कल असणाऱ्या क्षेत्रात शिक्षण घेणे महत्त्वाचे आहे. MKCL चा हा मोफत उपक्रम ग्रामीण आणि शहरी अशा दोन्ही भागांतील विद्यार्थ्यांसाठी एक दिशादर्शक ठरणार आहे.