देवगड : देवगड तालुक्यातील विजयदुर्ग किल्ल्यावर हेलियम वायूचे फुगे हवेत सोडून विश्व हेलियम दिवस विजयदुर्ग येथे मोठ्या उत्साहात साजरा करण्यात आला. यावेळी सुसज्ज विज्ञान केंद्र व्हावे अशी अपेक्षा माजी आम.प्रमोद जठार यांनी व्यक्त केली.
यावेळी विजयदुर्ग सरपंच रियाज काझी, माजी पंचायत समिती उपसभापती रवी तिर्लोटकर, माजी पंचायत समिती सदस्या शुभा कदम, पडेल मंडल भाजपा महिला अध्यक्ष सुप्रिया आळवे भाजपा सचिव प्रदीप साखरकर इतिहास प्रेमी राजेंद्र परूळेकर ग्रामपंचायत सदस्य दिनेश जावकर ग्रेसीस फर्नांडिस विनायक चोडणेकर निलेश मणचेकर शिडवणे सरपंच रवी शेट्टे आदी उपस्थित होते.
जय जवान जय किसान जय विज्ञानच्या जयघोषात तरुण पिढीने विज्ञानाचे जनक व्हा असा संदेश सुनीता शांताराम ट्रस्टचे संस्थापक अध्यक्ष तथा माजी आमदार प्रमोद जठार यांनी विजयदुर्ग किल्ल्यामध्ये दिला.किल्ल्यातील साहेबांचे ओटे येतील माहिती फलकाला पुष्पहार अर्पण करून आणि हेलियम वायूचे फुगे हवेत सोडून विश्व हेलियम दिवस मोठ्या उत्साहात साजरा करण्यात आला. त्यावेळी नेहरू विज्ञान केंद्र मुंबईचे सुहास नाईक साटम, विज्ञान प्रेमी डॉक्टर सुनील आठवले, पवन परुळेकर प्रमुख अतिथी म्हणून उपस्थित होते.
शासनाच्या वतीने विजयदुर्ग ग्रामपंचायत आणि सुनीता शांताराम ट्रस्ट कासार्डे यांच्या संयुक्त विद्यमाने हा उपक्रम प्रतिवर्षाप्रमाणे राबविण्यात आला. दरम्यान, सिंधुदुर्ग जिल्ह्यामध्ये सुसज्ज विज्ञान केंद्र व्हावे अशी अपेक्षा व्यक्त करताना प्रमोद जठार यांच्या प्रयत्नाने भावी पिढीला विज्ञानाची आवड निर्माण होत असल्याचे सुहास नाईक यांनी आवर्जून सांगितलं.यावेळी सुनील आठवले यांनीही हेलियम संदर्भात भाष्य केलं. विजयदुर्ग हायस्कूलचे शिक्षक परचुडे यांनी हेलियमचा शोध त्याचे महत्त्व आणि उपयोग याविषयी मार्गदर्शन करताना विद्यार्थ्यांच्या ज्ञानात मोलाची भर घातली.
सुरुवातीला विजयदुर्ग डेपो येतील गणेश मंदिरात श्रीफळ फोडून या उपक्रमाला सुरुवात करण्यात आली. ढोल ताशांच्या गजरात आणि हेलियम वायूचे फुगे घेऊन भव्य रॅली काढण्यात आली.किल्ल्यातील भवानी मातेच्या मंदिरातून साहेबाचे ओटे येथे पुढील कार्यक्रम यावेळी झाला.
